Düşmən tərəf Milli Qəhrəmanımızın rəşadətini heç cür sinirə bilmir; Gürcüstanda ermənilərlə Qarabağ müzakirələrinə qatılan azərbaycanlı jurnalistlər doğrudanmı şəhidimizin igidliyini “utancverici cinayət” kimi təqdim ediblər?
Mübariz İbrahimov - bu ad artıq 4 ildir ki, təkcə Azərbaycanda deyil, işğalçı Ermənistanda da məşhurdur. 2010-cu ilin isti iyun günlərinin birində 22 yaşlı bu gənc gizir cəbhə xəttində ikən “Ölənədək bu şərəfsizlərin üzərinə gedəcəyəm” deyibən düşmən üstünə təkbaşına şığıdı və misilsiz bir qəhrəmanlıq nümunəsi göstərdi, tarixdə qalacaq bənzərsiz şəhidlik örnəyi yaratdı.
Vikipediyada bununla bağlı oxuyuruq: “Təsdiq edilməmiş versiyalara görə, 2010-cu ilin 18 iyununda gecə saat 23:30 radələrində gizir Mübariz İbrahimov təkbaşına iki ordu arasındakı bir kilometrlik minalanmış sahəni keçir. Ermənistan Silahlı Qüvvələrinin çox sayda əsgər və zabitini gözlənilməz şəkildə birinci həmlədə məhv edir. Sonra isə düşmənin öz silahlarını özünə qarşı istifadə edərək 5 saat onlarla təkbətək döyüşur. Düşməni ağır itkilərə məruz qoyur, onların zəif cinahlarını üzə çıxarır. Azərbaycan döyüşçüsü səhər saatlarında qeyri-bərabər döyüşdə qəhrəmancasına həlak olur”.
Beləcə, Mübariz sözünün üstündə duraraq getdi və müvəqqəti hərbi qələbənin eyforiyasından qurtula bilməyən düşmənə Azərbaycan xalqının necə mübarizlər yetişdirdiyini əyani xatırlatdı, ermənilərə ləyaqət dərsi keçdi. İşğalçı qüvvələrin ürəyinə indiyədək də silinməyən xof saldı. Onlara üzərində oturduqları torpaqların sahibinin bir gün mütləq qayıdacağını anlatdı.
Mübarizin düşmənə təkbaşına vurduğu qəfil və sarsıdıcı zərbənin erməni ordusunda və toplumunda yaratdığı şok effektin nəticəsi idi ki, şəhidimizin mübarək cəsədini qarşı tərəf aylarla qaytarmaq istəmədi, hətta meyitdən belə qisas almaq kimi xristianlığa da xas olmayan rəzil hərəkətlərə getdi.
Bu da təsadüfi deyil ki, göstərdiyi igidliyə görə Azərbaycanın Milli Qəhrəmanı adı alan Mübariz İbrahimovu ermənilər heç cür yaddaşlardan silə bilmir, düşmən mətbuatı isə onun rəşadətini kiçiltmək, erməni gəncliyindəki xofu götürmək üçün onu hətta aşağılamaqdan belə çəkinmirlər. Diqqətinizə təqdim edəcəyimiz materialdan bunu görmək çətin deyil.
* * *
Öncə məlumat üçün bildirək ki, Azərbaycan və Ermənistanın jurnalist, ekspert ictimaiyyətinin təmsilçiləri, tarixçilər vaxtaşırı olaraq neytral ərazidə - Gürcüstanda bir araya gələrək Dağlıq Qarabağ, barışıq yolları mövzusunda müzakirə aparırlar. “İmecin” (Imagine Center for Conflict) Konfliktləri Önləmək Mərkəzinin təşkil elədiyi “Dialoq” adlı növbəti belə görüş yanvarın 11-dən 17-dək Gürcüstanın Bakuriani kurort şəhərində keçirilib.
Budəfəki görüşdə KİV nümayəndələri iştirak ediblər (İndiyədək “Dialoq”da gənclər təşkilatlarının nümayəndələri, tarixçilər və yarımrəsmi qrupların təmsilçiləri bir araya gəliblər). Həmin görüşdəki diskussiyalarla haqda tədbirin iştirakçısı olmuş aravot.am erməni saytının əməkdaşı Melanya Bersaqyanın bəzi qeydləri maraq doğurur. Bersaqyan belə görüşlərin pozitiv əhəmiyyətindən söz açaraq bildirir ki, tərəflərin bir-birini anlamaq yönündə daha ciddi nəticəyə gəlib çıxması heç də irreal deyil.
Sitat: “Tədbir göstərdi ki, iki xalqı təmsil edən jurnalistlər nəinki sakit şəkildə Hollivud filmləri və futbol haqda danışa, həm də tarixin kəsişmə nöqtələrində xalqlarımızın münasibətlərinə yetərincə güclü neqativ təsir göstərmiş məsələləri də tarazlı formada müzakirəyə çıxara; millətlərarası düşmənçiliyin səbəblərini anlamağa cəhd göstərə, Qarabağ konfliktinin həlli yollarına baş vura bilərlər. Hazırkı duruma toxunan tərəflər etiraf elədi ki, düşmən obrazı bizim cəmiyyətlərimizin dərin qatlarında kök salıb və bu stereotipi sındırmaq üçün böyük səylər, uzun zaman və güclü istək lazımdır”.
Jurnalist ardınca yazır: “Məhz belə bir atmosferdə məsələn, azərbaycanlı jurnalist və tarixçi (ad çəkilmir -red.) Stepanakertdən gəlmiş və ”qarabağlılar heç cür təsəvvürə gətirmirlər ki, nə vaxtsa qayıdacaq azərbaycanlılarla birgə yaşaya bilərlər" ifadəsini bir neçə dəfə təkrarlayan gəncə gücünü toplayıb belə bir sual ünvanladı: “Bəs əgər Azərbaycan ”DQR"in müstəqilliyini tanısa, onlar Qarabağ kökənli azərbaycanlıları geri qəbul eləməyə hazır olacaqmı?" “Yox, onlar bu haqda eşitmək belə istəmirlər, çünki birincisi, müharibənin yaraları hələ sağalmayıb, ikincisi də təhlükə var ki, ciddi demoqrafik problem yaranacaq və azərbaycanlıların sayı yenidən erməniləri üstələyəcək” cavabını eşidincə “yaxşı mən sizin mövqeyinizi anladım, hər şey aydındı” söylədi".
Xocalı qətliamından da danışılıb: “Bu məsələ müzakirə olunmaya bilməzdi. ”Həmkarlarımız “Ermənilər üçün ”genosid" nədirsə, azərbaycanlılar üçün də Xocalı hadisəsi birmənalı və müzakirəsinə ehtiyacı olmayan mövzudur" deyirdilər. Onlarda heç bir şübhə yoxdur ki, Xocalıda dinc əhali qətliam edilib. Və erməni tərəfinin bu qətliamı məhz azərbaycanlıların özləri təşkil edib kimi yanaşması azərbaycanlılara absurd görünürdü. Onlar onu da qeyd elədilər ki, Xocalı azərbaycanlıların individuallığı baxımından birləşdirici bir ideya, hadisə rolu oynayıb".
* * *
Nəhayət, məqalənin Mübariz İbrahimovla bağlı ilginc məqamı. Oxuyuruq: “Hər iki tərəf ötən əsrin 20-ci əsrin əvvəllərindəki hadisələri, Sumqayıt talanlarını, Səfərovun cinayətini, DQMV Ali Şurasının Ermənistana birləşmə haqda bəyannaməsini və s. də yada saldılar. Azərbaycan tərəfi ABŞ-ın o zamankı dövlət katibi Hillari Klitonun səfəri ərəfəsində kiçik leytenant Mübariz İbrahimovun sərhədi keçərək yatan 8 erməni əsgərini qətlə yetirməsi faktını utancverici və qeyri-məqbul cinayət fakt kimi xatırladı”.
Ermənilərin Mübariz İbrahimovdan yanıqlı olması və yumşaq desək, faktları təhrif eləməsi yeni məsələ deyil. Lakin istənilən halda, yazıda Milli Qəhrəmanımızın ruhu şərəfsizcəsinə təhqir edilib. Üstəlik, təhqirin azərbaycanlı jurnalistlərin öz dilindən səsləndiyi iddiası var.
Sözügedən görüşdə Azərbaycan tərəfini konkret olaraq kimlərin təmsil elədiyi barədə bizdə dəqiq bilgi yoxdur. Ümid edək ki, həmin şəxslər tezliklə özləri üzə çıxaraq Bersaqyanın iddialarına cavab verəcək, ictimaiyyətə aydın mövqe sərgiləyəcəklər. Axı, söhbət hər şeydən öncə milli qürurumuzdan və bu qürurun Mübariz İbrahimov brendindən gedir...
/musavat.com/
Xəbərdən istifadə edərkən istinad etmək vacibdir.
