****
Hacıqabulda qatar qəzası: 7 vaqon relsdən çıxdı
Hacıqabul rayonu, Qarasu qəsəbəsi ərazisində Bakı-Ucar istiqaməti ilə hərəkət edən 43 vaqondan ibarət yük qatarında da qəza hadisəsi baş vermişdi. Qəza nəticəsində 7 vaqon relsdən çıxmışdı. Benzinlə dolu çənin üst qapağından sızan yanacaq yanıb. Relsdən çıxan 62 ton yanacaqla dolu çəndən yolun kənarına yanacaq dağılmışdı.
04/01/2014
****
Qatar relsdən çıxdı: 6 taxıl vaqonu aşdı
"Azərbaycan Dəmir Yolları" Qapalı Səhmdar Cəmiyyətinin Muğan-Qarasu mənzilində Hacıqabuldan Gəncə istiqamətinə hərəkət edən yük qatarının 15 vaqonu relsdən çıxıb, 6 taxıl vaqonu aşmış və yükü dağılıb.
29/01/2014
****
Qatar minik maşınının üzərinə çıxıb 
Binəqədi rayonunda, Baksol ərazisində Biləcəri qəsəbəsi istiqamətindən gələn qatarın sisternlərindən biri çıxmış və bir-iki kilometr yuvarlandıqdan sonra qarşısına çıxan "VAZ-21011" markalı minik maşınının üzərinə çıxmışdı. Sistern "VAZ-21011"i sürüyərək bir neçə metr aparmışdı. Qarşısına çıxan beton maşınına dəyərək dayanmışdı. Parçalanan minik maşınının qalıqları böyük əraziyə yayılmışdı.
23/07/2014
****
Yanacaqla dolu 15 vaqon relsdən çıxdı
Bakının Nizami rayonunda da qatarın relsdən çıxması səbəbindən qəza baş vermişdi.
"Azərbaycan Dəmir Yolları" Qapalı Səhmdar Cəmiyyətinin (QSC) mətbuat xidməti bildirmişdi ki, Keşlə qəsəbəsində yanacaq sisternləri daşıyan qatar hərəkətdə olarkən relslər aralanıb və bir neçə təkər cütü relsdən çıxıb. Nəticədə yanacaq məhsulları ilə dolu 15 vaqon relsdən çıxmışdı. Qəza baş verən ərazi yaşayış evlərinin yaxınlığında olduğuğu üçün əhali qorxuya düşmüşdü.
21/10/2014
****
"Volkswagen” qatarla toqquşdu: 2 yaralı
Xızı rayonunun Giləzi qəsəbəsi ərazisində Bakı istiqamətində gedən yük qatarı ilə "Volkswagen” markalı minik maşını toqquşub. Qəza nəticəsində 2 nəfər yaralanıb.
21/11/2014 
****
Ağstafada qatar kənd sakinini vurdu 
Dəhşətli qatar qəzalarından biri də Ağstafa Dəmir Yolu Stansiyasının ərazisində olmuşdu. Belə ki, Böyük Kəsik - Gəncə elektrik qatarı Yuxarı Göyçək kənd sakini Süleyman Rəhimovu vurmuş və o, hadisə yerində ölmüşdü.
15/12/2014
****
Şəmkirdə qatarla minik maşını toqquşub: 1 ölü, 2 yaralı
Faciə ilə nəticələnən qatar qəzalarından biri də Şəmkir rayonunun Sabirkənd kəndi ərazisində baş verib.
Belə ki, Bakı-Böyük Kəsik dəmiryolu xəttinin sözügedən ərazidən keçən qorunmayan keçidində qatar minik maşını ilə toqquşmuşdu.
Qəza nəticəsində bir nəfər ölmüş, 2 nəfər isə yaralanmışdı.
08/05/2015
****
Qatar relsdən çıxdı: sərnişinlər evakuasiya edildi
Balakəndən Bakıya gələn 656-664/655-663 saylı Bakı-Köçərli-Balakən-Bakı sərnişin qatarı isə "Keşlə" stansiyasına 400 metr qalmış relsdən çıxmışdı. Aşma təhlükəsi olan qatardan sərnişinlər təcili evakuasiya edilmişdi.
21/07/2015 
****
"KİA" qatarla toqquşdu: 4 nəfər ağır xəsarət aldı
Azərbaycan Dəmir Yolunun Heybət-Buta mənzilinin keçid növbətçisi dəmir yolu keçidini bağlayıbmış. Lakin KİA markalı avtomobilin qadın sürücüsü tələsdiyini bildirib və ondan keçidi açmağı xahiş edib. Növbətçi şlaqbaumu açıb, minik maşını keçərkən sürətlə yük qatarı keçidə yaxınlaşıb. KİA-nın sürücüsü özünü qorxudan itirib və maşını dəmiryolu xəttinin üstündə saxlayıb. Nəticədə qatar maşını vurub. Hadisə nəticəsində üç bacı – 42 yaşlı Əliyeva Xatirə Əhyəli qızı, 38 yaşlı Əliyeva Alidə Əhyəli qızı, 46 yaşlı Aslanova Cavidə Əhyəli qızı və sonuncunun övladı, 13 yaşlı Aslanov Həsən İlkin oğlu ağır xəsarət alaraq xəstəxanaya düşüblər.
Videodan da aydın şəkildə görünür ki, qatar yaxınlaşarkən avtomobil relsin üstündə dayanıb gözləyir. Qatar da onu bir zərbəylə vurub kənara atır.
14/01/2016
****
Qatar çörək daşıyan "Qazel"i vurdu: 2 ölü
Bakıda Qala yolunda qatar çörək daşıyan "Qazel"i vurub. Qəza nəticəsində "Qazel"in sürücüsü və bir nəfər sərnişin yerindəcə dünyasını dəyişib.
07/10/2016
****
Qatar traktoru vurdu: 3 nəfər yaralandı 
Bərdədə məcburi köçkünlər üçün salınmış qəsəbə ərazisində qatar traktoru vurub
Toqquşma nəticəsində 3 nəfər xəsarət almışdı. Traktorun sürücüsü Z. Bağırovun ayaqları amputasiya olunmuşdu.
16/05/2018