Ümumdünya miqyasında baş verən məlum məsələlərə görə ölkədə olan xarici vətəndaşların ölkədə qalma vaxtının uzadılması istiqamətində Dövlət Miqrasiya Xidməti sadələşdirilmiş qayda təşkil edib ( çox təqdirəlaiq bir haldır ) və 30 aprelədək bütün müraciətləri qəbul edilmiş hesab etmişdir. Başqa sözlə desək bunun üçün dövlət rüsumunu ödəmək kifayət edir. Lakin onların avtomobillərinin ölkədə olma müddəti bitdikdə avtomobilləri Gömrük Komitəsinin xüsusi dayanacaqlarında, özü də imperativ qaydada ( məcburi) 1 günü 1-3 manata saxlanılmalıdır. Əks halda müddətdən aslı olaraq 750 manatadək cərmə nəzərdə tutulmuşdur. Bu məbləğlər isə xüsusən də indiki vaxtda az məbləğ deyil. Digər tərəfdən avtomobili dayanacaqda saxlamaq bəzi ailələr üçün bir çox digər çətinliklər də yaradacaqdır və onsuz da ağır olan vəziyyəti bir qədər də ağırlaşdıracaqdır. Ölkə ərazisində xüsusi karantin rejiminim tətbiq olunmasına baxmayaraq, qeyd olunan ağır cərimələrə məruz qalmamaq üçün insanlar avtomobillərinin müddəti bitdiyinə görə kütləvi şəkildə gömrük ərazisinə axışırlar. Bu da karantin rejiminin tələblərinə ziddir və virusun yayılması üçün böyük təhlükədir.
Qeyd etdiyim kimi bu vəziyyət respublikada olan əcnəbilər, əsasən də Gürcüstanın Borçalı bölgəsindən olan soydaşlarımız (əksəriyyəti) üçün çox böyük problemlər yaradır. Misal üçün yaranmış epidemialoji vəziyyətlə bağlı tibb müəssisələrinə gedib-gələ bilməməsi, aprel ayında övladlarının həyata gəlməsini gözləyən xarici vətəndaşların özlərinə məxsus olan avtomobillərdən istifadə edə bilməməsi, karantin dövründə zəruri ərzaq mallarının əldə edilməsi və s. siyahını çox uzatmaq olar. Bu hallar onlara böyük problem və çətinliklər yaradacaqdır. Hesab edirəm ki, Gömrük Komitəsinin bu istiqamətdə hansısa işlər görməsi zəruridir. Olmazmı ki, xarici vətəndaşların olma müddətinə elə onların avtomobillərinin qalma vaxtı da hesab edilsin?
Qeyd edim ki, Gömrük Komitəsinin məlumatına görə, avtomobillərin ölkədə qalma vaxtını uzatmaq üçün mütləq sərhəddən çıxış və giriş edilməlidir. Eyni zamanda depozit yalnız sərhəd buraxılış məntəqələrində qoyulmalıdır. Bu barədə qeyd olunan Komitəyə dəfələrlə müraciət olunsa da adı çəkilən qurum məsələyə aydınlıq gətirməyi belə özünə rəva bilmir. Hesab edirəm ki, heç olmasa belə bir çətin vaxtda bu məsələyə təxirəsalınmaz qaydada baxılmalı və müsbət qərar verilməlidir.
Vəkil Elşad İsayev
Xəbərdən istifadə edərkən istinad etmək vacibdir.