"Ermənistanın öz istehsalı olduğu bildirilən ilk peyki bu gün orbitə qaldırılmalıydı. Yüksək Texnologiyalar Nazirliyi bunun 2 gün təxirə salındığını açıqlayıb. "Hayasat-1" adlandırılan peyk Ermənistanın 3 il öncə yaradılan qeyri-kommersiya qurumu, "Bazumk" (Bazoomq Space Research Lab) tərəfindən hazırlanıb".
Xeberle.com məlumat verir ki, bunu IT sahəsi üzrə ekspert Osman Gündüz deyib. O bildirib ki, bu qurum Ermənistanda kosmik fəaliyyət üçün lisenziya alan ilk özəl laboratoriyadır:
"Əvvəllər tələbə və məktəblilərin iştirakı ilə "CubeSat" adlı peyk hazırladıqları və Hindistan raketinin köməyi ilə orbitə qaldırdıqları da məlumdur. İndi hazırladıqlarının çəkisi 1 kg-dır, hər hansı xüsusi təyinatı yoxdur, ermənilər bunun sadəcə özəl məhsul olmağını vurğulayırlar.
İdarəetməsini də özləri Bazumk dan reallaşdıracaqlar. "Hayasat-1" "SpaceX"in "Falcon-9" raketdaşıyıcısı vasitəsilə orbitə qaldırılacaq".
"Xatırladıram ki, Ermənistan ötən il İspaniyanın "Satlantis" şirkətinin dəstəyi ilə "ArmSat1" müşahidə peykini də orbitə qaldırıb. Hazırda bunun idarəetmə mərkəzinin qurulması üzərində çalışırlar", - deyə ekspert əlavə edib.
Xəbərdən istifadə edərkən istinad etmək vacibdir.
