Hər il Sumqayıt təhsilinin yetişdirdiyi istedadlı şagirdlərin beynəlxalq və respublika əhəmiyyətli yarış və müsabiqələrdə qazandıqları uğurlarla, əldə etdikləri nailiyyətlərlə yadda qalır.
Sumqayıtın xüsusi bilik və bacarıqlara, istedada, olimpiada nailiyyətlərinə görə fərqlənən şagirdlərindən İsayev qardaşlarını nümunə göstərə bilərik. Belə ki, şəhərin Y.Məmmədəliyev adına 31 nömrəli tam orta məktəbin 9-cu sinif şagirdi Mehman İsayev Kings Beynəlxalq Olimpiadasında ingilis dili üzrə birinci yerə layiq görülərək qızıl medal qazanıb. Onun qardaşı 7-ci sinif şagirdi Elman İsayev isə Beynəlxalq Kings Olimpiadasında riyaziyyat fənni üzrə qızıl medala layiq görülüb. İsayev qardaşları eyni zamanda, peşəkar idman növü ilə də məşğuldurlar. Onlar idman sahəsində də diplom və medallarla təltif ediliblər.
Xeberle.com-un əməkdaşı İsayevlər ailəsində qonaq olub. Sumqayıtın təhsil həyatında xüsusi uğurları ilə fərqlənən Mehman və Elman İsayevlərlə həmsöhbət olub:
- Həyatınızda beynəlxalq olimpiadaların rolunu necə qiymətləndirərdiniz?
(Mehman) Belə uğurlar mənə motivasiya mənbəyi olur, dərslərə marağımı bir az da artırır.
(Elman) Beynəlxalq olimpiadada iştirak məndə özümə inam hissi yaradır.
- Olimpiadaya hazırlıq zamanı nələrə diqqət edirdiniz?
(Mehman) Olimpiadaya hazırlıq elə 9-cu siniflərin buraxılış imtahanlarına hazırlıqla paralel olub. Dərslərə daha çox vaxy ayırmaq mütlədir.
(Elman) Olimpiadaya xüsusi hazırlamamışdım. Gündəlik keçilən mövzuları evdə anamla bərabər təkrar etməyim kifayət etdi.
- Bu uğurlarınızla bağlı Təhsil Nazirliyi tərəfindən sizə dəstək gəldimi?
(Mehman) Xeyr, bu, beynəlxalq olimpiadadır, şəxsi vəsaitimiz hesabına qatılmışıq. Bizə belə şərait yaratdıqları üçün valideynlərimizə təşəkkür edirik.
(Elman) Xeyr, heç bir dəstək gəlməyib.
- Müxtəlif ölkələrin təmsilçiləri və təhsil sistemlərinin mübarizəsində bəyəndiyiniz hansı sistem var ki, onun ölkəmizdə tətbiqini istərdiniz?
(Mehman) Məktəblərimizin daha çox akademik bilik deyil, həyat, gələcək yönümlü bacarıq və vərdişlər verməsini istərdim.
(Elman) Bəzən düşünürəm ki, ev tapşırıqlarının az olması lazımdır. Bunun dəyişməsini istərdim.
- Olimpiada qalibi kimi uğurlarınızın sirrini necə izah edərdiniz?
(Mehman) Olimpiada qalibi olmağın sirri zəhmətdir. Əziyyət varsa, nəticə də var.
(Elman) Məsuliyyət və disiplin. Mən ev işlerini yerinə yetirməmiş digər fəaliyyətlərimlə məşğul olmuram.
- Uğurlarınızda müəllimlərinizin rolunu necə qiymətləndirərdiniz?
(Mehman) Müəllimlərimin rolu danılmazdır. Buradan hər birinə təşəkkür edirəm.
(Elman) Uğurlarımda müəllimlərimin rolu çox böyükdür. Mən əlavə hazırlığa getmirəm. Ona görə də müəllimlərimə təşəkkür edirəm.
- Sizcə, olimpiadalara hazırlıq hansı yaşdan başlanmalıdır? Bu barədə şagirdlərə nə kimi tövsiyələriniz var? Bu sahədə təcrübə və biliklərinizi bölüşürsünüzmü?
(Mehman) Məncə, ibtidai sinfdən yaxşı oxuyaraq, 5-6-cı siniflərdən başlamaq olar.
(Elman) Məktəbə ilk gəldiyimiz gündən məsuliyyətli olsaq, istənilən uğuru əldə edərik.
- Gələcək planlarınız barədə nə deyə bilərsiniz? Gələcəkdə özünüzü harada görürsünüz?
(Mehman) Gələcəkdə özümü peşəkar pilot olaraq görürəm. Məqsədim MAA-nin "Uçuş mühəndisliyi"ixtisasına qəbul olmaqdır. Bunun üçün dərslərimi yaxşı oxuyuram. Bundan əlavə boş vaxtlarımda idmanla məşğul oluram. Beş ildir ki, peşəkar şəkildə şotokan karate-do ilə məşğulam. Müəllimim Rafael Məmmədovun sayəsində son qəhvəyi kəmər sahibi, qara kəmər namizədiyəm. Düşünürəm ki, savad və sağlamlıq ikisi bir arada gözəldir.
(Elman) Mən gələcəkdə özümü araşdırmaçı (tədqiqatçı) və ya idmançı kimi görürəm. İki idman növü ilə məşğulam. May ayının 10-da Ümummilli lider Heydər Əliyevin 102 illiyinə həsr olunmuş seminarda 4 illik zəhmətimin nəticəsi olan Beynəlxalq dərəcəli Qara Kəmər 1-Dan mənə təqdim olundu. Bu beynəlxalq pasport və diplom Yaponiyadan gəlib və dünyada tanınır. Bundan başqaiki ildir ki, Sumqayıt futbol klubunda müdafiəçi olaraq oynayıram. Məncə, hər bir şagird həm savadlı, həm sağlam olmalıdır.
- Sumqayıtda hansı yenilikləri görmək istərdiniz?
(Mehman) Mütaliə etməyi çox sevirəm. Ona görə istəyərdim ki, şəhərimizdə zəngin və müasir standartlara cavab verən kitab evləri olsun.
(Elman) Sumqayıtı çox sevirəm. Bu şəhərdə baş verən hər yenilik məni sevindirir.
- Sumqayıt təhsil haqqında fikirlərinizi bölmək istərdik.
(Mehman) Sumqayıt təhsili həmişə ön sıralarda olub. Arzu edirəm ki, həmişə də belə olsun. Sumqayıt təhsilində əziyyəti olan hər kəsə, hər müəllimə başda anam və müəllimlərim olmaqla təşəkkür edirəm.
(Elman) Sumqayıt məktəbləri həmişə öndə olub. Bu, zəhmətkeş müəllimlərin uğurudur. Hamıya dərslərində uğurlar arzulayıram.
- Hər ikinizə bizə vaxt ayırdığınız üçün təşəkkür edirik.
Siz də sağ olun
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
