Dövlət büdcəsində nəzərdə tutulmuş məqsədli xərclərdən və ehtiyat mənbələrdən ayrılmış 227,8 milyon manat məbləğində vəsait də nəzərə alınmaqla, təhsil sahəsinə dövlət büdcəsi xərclərinin 12,2 faizi həcmində və ya 4617,8 milyon manat məbləğində vəsait yönəldilmişdir ki, bu da 2023-cü illə müqayisədə 247,2 milyon manat və ya 5,7 faiz çoxdur.
Xeberle.com məlumat verir ki, bu barədə Azərbaycan Respublikasının 2024-cü il dövlət büdcəsinin icrası barədə illik hesabatında qeyd olunub.
Son 5 ildə, yəni 2020-ci illə müqayisədə 2024-cü ildə təhsil xərclərinin dövlət büdcəsi xərclərinin tərkibində xüsusi çəkisi 1,1 faiz-bənd, mütləq ifadədə isə 1615,7 milyon manat və ya 1,6 dəfə artmışdır.
Funksional təsnifata uyğun olaraq (məqsədli xərclərdən və ehtiyat mənbələrdən ayrılmış vəsait istisna olmaqla), təhsil xərcləri üzrə istifadə olunmuş vəsaitin 2289,4 milyon manatı (2023-cü illə müqayisədə 45,3 milyon manat və ya 2,0 faiz çox ) və ya 52,1 faizi ümumi təhsil xərclərinin, 903,6 milyon manatı (2023-cü illə müqayisədə 15,4 milyon manat və ya 1,7 faiz çox) və ya 20,6 faizi təhsil sahəsində digər müəssisə və tədbirlərin (məktəbdənkənar təhsil müəssisələrinin, ərazi maliyyə hesablaşma mərkəzlərinin və mərkəzləşdirilmiş mühasibatlıqların saxlanılması xərclərinə, dövlət büdcəsindən maliyyələşən idarə və təşkilatların dövlət büdcəsindən ayrılmış təxsisatlardan əlavə daxil olmuş vəsaitlər hesabına maliyyələşdirilən xərcləri (büdcədənkənar xərcləri) və təhsil sahəsində digər tədbirlər), 579,4 milyon manatı (2023-cü illə müqayisədə 117,1 milyon manat və ya 25,3 faiz çox) və ya 13,2 faizi ali təhsil xərclərinin (dövlət sifarişi ilə ali təhsilin maliyyələşdirilməsi və digər ali təhsil müəssisələrinin fəaliyyətinin maliyyə təminatı ilə bağlı xərclər), 423,7 milyon manatı (2023-cü illə müqayisədə 70,5 milyon manat və ya 19,9 faiz çox) və ya 9,7 faizi məktəbəqədər təhsilin, 92,3 milyon manatı və ya 2,1 faizi orta ixtisas təhsilinin, 77,1 milyon manatı (2023-cü illə müqayisədə 11,7 milyon manat və ya 17,9 faiz çox) və ya 1,8 faizi peşə təhsilinin, 18,7 milyon manatı (2023-cü illə müqayisədə 8,2 milyon manat və ya 1,8 dəfə çox) və ya 0,4 faizi əlavə təhsilin, 5,9 milyon manatı və ya 0,1 faizi təhsil sahəsində tətbiqi tədqiqatların maliyyələşdirilməsinə yönəldilib.
Bununla yanaşı, dövlət sifarişi və dövlət hesabına kadr hazırlığının maliyyələşdirilməsi ilə bağlı xərclər hesabına 2024-cü il ərzində ali təhsil üzrə ödənişli əsaslarla təhsil alan məcburi köçkün statuslu 12528 nəfər, valideynlərini itirmiş və valideyn himayəsindən məhrum olmuş 665 nəfər, Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş və Azərbaycan Respublikasının azadlığı, suverenliyi və ərazi bütövlüyü uğrunda həlak olmuş, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların uşaqları olan 1600 nəfər, Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə "Müharibə veteranı” adı almış 667 nəfər, orqanizmin funksiyalarının 61-100 faiz pozulmasına görə, habelə 18 yaşınadək əlilliyi müəyyən edilmiş 574 nəfər, şəhid ailəsinin üzvü 11 nəfər, eləcə də sözügedən imtiyazlı şəxslər üzrə orta ixtisas təhsil müəssiələrində 2299 nəfər və peşə təhsili müəssiələrində 185 nəfər, cəmi 18529 nəfər tələbənin 51,4 milyon manat təhsil və valideynlərini itirmiş və valideyn himayəsindən məhrum olmuş tələbələrə 2,6 milyon manat təqaüd xərcləri, cəmi 54,0 milyon manat sərf edilib.
Xəbərdən istifadə edərkən istinad etmək vacibdir.
