Xanımlar hər zaman gözəl saç düzümü və özlərinə yaraşan makiyaj etməyə can atırlar. Buna isə hər vizajistin və saç ustasının əlində nail olmaq mümkün deyil. Məsəl var: "Çörəyi ver çörəkçiyə, birini də üstəlik”. Əlbəttə, günümüzdə hər bir işdə mütəxəssis tapmaq çox vacibdir. Amma bu, çox zaman heç də asanlıqla alınmır. Budəfəki müsahibimiz Sumqayıtın peşəkar saç və makyaj ustası Cəvahir Mirahadilidir (Hadi).
HAŞİYƏ: Cəvahir Hadi 1977-ci ildə Qubadlı rayonunda anadan olub. 1993-1997-ci illərdə Bakı Dövlət Universitetində təhsil alıb. 2001-ci ildən "Sevil” gözəllik salonunda saç və makiyaj ustası kimi fəaliyyət göstərir. Ailəlidir və 2 övladı var.
Cəvahir Hadi peşəyə gəlişini belə izah edir...
Uşaqlıqdan bu sənətə həvəsim olub. Geologiya fakültəsini bitirsəm də, yaratmaq, qurmaq həvəsi məni bu işə doğru yönəlməyə sövq etdi. İlk vaxtlar qohumlarımın, tanışlarımın saçlarını bəzəyirdim. Daha sonra valideynlərimin də köməyi ilə gözəllik salonunda işə başladım. Atam bu işdə həmişə yanımda olub, işlədiyim gözəllik salonunu da o mənə hədiyyə edib. Bibim qızı kosmetoloq idi və o, mənə işə başlamağım üçün təkan verdi. Bundan sonra saçını yığdığım hər kəs məndən razı qalırdı və mən getdikcə əl işlərimə öz ideyalarımı da əlavə edirdim. Uğurlarımı ilk olaraq Allahıma, sonra isə valideynlərimə borcluyam.
Artıq 16 ildir ki, bu sənətdəyəm.
Övladım yaş yarım olarkən mən bu işə başlamışam. İnanın Allaha, bu iş üçün mənim nə xüsusi təhsilim, nə də ki, müəllimim olub.  2001-ci ildən atam hazırda işlədiyim yeri mənə aldı və mən fəaliyyətə başladım. Əl işimi bəyənənlər məni digərlərinə də tövsiyə edirdilər və beləliklə də yavaş-yavaş tanınmağa başladım.
Ətrafımdakıların təkidi ilə özümü dünya miqyasında tanıtmağa qərar verdim
Yığdığım saç modellərinə bələd olan hər kəs mənə müsabiqələrdə iştirak etməyi tövsiyə edirdilər. "İnstagram” və "Facebook” vasitəsilə əl işlərimi paylaşırdım və izləyicilərim tərəfindən çox bəyənilirdi.  Odur ki, sosial şəbəkələrdə əl işlərimi görən izləyicilər də yarışlara qatılmağımı məsləhət görürdülər. 2016-cı ildən turnirlərdə iştirak etməyə başladım. İlk olaraq Azərbaycanda "World Beauty Congress”in təşkilatçılığı ilə  keçirilən müsabiqəyə qatıldım və qalib oldum. Daha sonra  ölkəmizdə keçirilən Avrasiya çempionatını üçüncülüklə bitirdim. Amma mən əl işimi daha üstün hesab edirdim və qalib olacağıma inanırdım. Bu ilin may ayının 12-də Dubayda keçirilən dünya çempionatında iştirak etdim. Yarışda 20 ölkədən 39 komanda iştirak edirdi. Bunlardan dördündə azərbaycanlılar, digər komandalarda isə ruslar, ərəblər, amerikanlar, afrikalılar və s. qərarlaşmışdılar. Çox şükür ki, bu yarışdan da üzüağ çıxdım, Azərbaycanın bayrağını qaldırdım və vətənə birinciliklə qayıtdım. Sonrakı yarışlara isə məni təşkilatçılar dəvət ediblər.
Türkiyədən seminarlar və özəl dərs üçün dəvət almışam
"İnstagram”da paylaşdığım əl işlərimə Türkiyədən də xüsusi maraq göstərirlər, hətta mən deyərdim ki, məni Azərbaycandan daha çox Türkiyədə tanıyırlar. Fevralın 6-da məni Antalya şəhərinə seminar üçün şəxsən dəvət etmişdilər və nəticə uğurlu olduğundan oktyabr ayına Bodruma və sonuncu yarışdan əldə etdiyim birincilikdən sonra Türkiyəyə bir həftəlik özəl dərs üçün dəvət almışam. Bu vaxta qədər işlərimi yalnız sosial şəbəkələrdə paylaşırdım, amma bundan sonra televiziya verilişlərində də özümü və düzətdiyim saç modellərini tanıtmağı düşünürəm.
Elnarə Salamova
Xeberle.com

 

 

 

 

 

 

Xəbərdən istifadə edərkən istinad etmək vacibdir.