Yaxın zamanlarda "Artlemma” film şirkətinin istehsalı olan "O kuş buraya gelecek” filminin təqdimatı baş tutacaq.
Oxu.Az-a açıqlama verən aktyor Müşviq Şahverdiyev bildirib ki, filmə maraq olduqca böyükdür.
"Bu ilin sonuna kimi iki filmimizin qalası gözlənilir: "Kəklikotu” və "O kuş buraya gelecek”. İkinci filmin qalası yanvar ayına qədər uzana bilər. Həmin film türklərlə ortaq çəkilib. Ufuk Özkan, Mehtap Bayri kimi tanınmış aktyor və aktrisalarla çalışmışıq.Hər iki filmin uğur qazanacağına inanıram. Əlbəttə, istəyərəm ki, "O kuş buraya gelecek” filmi çox sevilsin və baxılsın. Çünki bu film həm də Türkiyədə nümayiş olunacaq. Hər aktyor istər ki, ölkəsindən kənarda tanınsın. Bu film mənim üçün dəhliz rolunu oynaya bilər. İlk qala gecəsi Türkiyədə, sonra Azərbaycanda baş tutacaq. Özümə o qədər güvənirəm ki, o filmdən sonra yeni təkliflərin olacağına inanıram. Çünki bütün gücümü ortaya qoymuşam”.
Aktyor daha sonra hazırda yeni bir filmin üzərində işlədiyini bildirdi: "Niyə 3?” filminin çəkilişlərinə başlamışıq. Amma bu dəfə adını dəyişəcəyik, lakin obrazlar qalacaq. Çünki rəhbər şəxslərlə məsləhətləşəndən sonra belə qənaətə gəldik ki, niyələrə həmişə cavab tapmaq olmur. Filmin müəllifi Fariz Əliyev təklif verdi ki, filmin adı "Ağ tük” olsun. Burada da Asimanla İsabalanın şansından söhbət gedir. Mart ayında bu filmin qala gecəsi planlaşdırılır. Bu filmdə yeni nəfəs var. Bundan əvvəlki filmdən 20 dəfə güclü film olacaq. Birinci "Niyə” ilə ikinci arasında 10 il vaxt olmuşdu. İnanıram ki, bu filmdə komanda olaraq çox yaxşı iş ortaya çıxaracağıq. Film tam olaraq ailə filmidir və sevdiklərinizlə rahat şəkildə izləyə biləcəksiniz. 18+ və digər vulqar səhnələr yoxdur”.
Sonda Müşviq aparıcılıq etməsindən də bəhs edib: "Heç vaxt aparıcılıq etməmişdim. "Xəzər TV”-də "Ailələr yarışır” adlı verilişin aparıcısıyam. Maraqlı məqam da odur ki, "O kuş buraya gelecek” filmindəki tərəf müqabilim Ufuk Özkan da mənim kimi öz ölkəsində eyni verilişin aparıcısı olub. Mən, sadəcə, bu sahədə özümü sınayıram, özümü professional aparıcı hesab etmirəm. Sadəcə olaraq, bu da maraqlı sahədir və təklif gəldi, qəbul etdim”.
Qeyd edək ki, "O kuş buraya gelecek” və "Kəklikotu” filmlərinin media dəstəyi Oxu.Az saytıdır.
Xəbərdən istifadə edərkən istinad etmək vacibdir.
