Ötən gün Sumqayıt Şəhər İcra Hakimiyyətinin başçısı Zakir Fərəcov Heydər Əliyev parkında yerləşən "Poeziya evi”ndə Azərbaycan Yazıçılar Birliyi Sumqayıt bölməsinin üzvləri olan şair və yazıçılar ilə görüşüb.
Tədbiri Azərbaycan Yazıçılar Birliyi Sumqayıt bölməsinin sədri Sabir Sarvan giriş sözü ilə açıb və sonra sözü qələm sahiblərinə verib.
Yazarlar çıxış edərək söz adamlarına göstərilən diqqət və qayğıya, poeziya sevənlərə belə bir şəraitin yaradıldığına görə öz minnətdarlıqlarını bildiriblər. Son bir il ərzində şəhərdə görülən işləri, Heydər Əliyev Mərkəzinin, şahmat məktəbinin, İncəsənət məktəbinin tikilib istifadəyə verilməsini, "Sülh” küçəsində aparılan genişləndirmə işlərini, əzəmətli park-bulvar kompleksinin yaradılmasını yüksək qiymətləndirərək ölkə başçısı İlham Əliyevə və şəhər rəhbərinə razılıqlarını bildiriblər.
Yazarlar özlərinin şerlərini oxuyub, arzu və istəklərini bildiriblər.
Sumqayıt şəhər İcra Hakimiyyətinin başçısı Zakir Fərəcov "Poeziya evi”nin yazıçıların istifadəsinə verilməsini əlamətdar hadisə adlandırıb və bu münasibətlə sumqayıtlı yazarları təbrik edib. Yazarları "Şəhərin brendləri” adlandıran şəhər rəhbəri belə dəyərli insanlarla bir arada olmaqdan məmnun olduğunu bildirib. Eyni zamanda, son bir il ərzində şəhərdə həyata keçirilən yeni layihələrə nəzər yetirib, gələcək planlardan danışıb. Sumqayıt və sumqayıtlılara göstərdiyi diqqət və qayğıya görə Prezident İlham Əliyevə bütün sumqayıtlılar adından təşəkkürünü bildirib.
Sumqayıtlı şair və yazıçılarla icra hakimiyyəti başçısının görüşü səmimi şəraitdə başa çatıb.
Xəbərdən istifadə edərkən istinad etmək vacibdir.
