Bəzi yazarlar onun sədr seçilməsini təqdir etsələr də, bəziləri bunu yazıçılar üçün təhqir hesab edərək tənqidi münasibət bildirmişdi.

 

Xeberle.com olaraq bu məsələyə Gülnarə Cəmaləddinin də münasibətini öyrəndik: "Mən bura işləməyə gəlmişəm. Böyük ağıllar həmişə böyük düşüncələrlə yaşayır. Mən heç vaxt xırdalıqlara, intriqalara getməyəcəm. Mənim məqsədim ədəbiyyatın xeyrinə iş görməkdir, başqa da heç bir məqsədim yoxdur. Onlara heç bir münasibət bildirmək istəmirəm, qoyun kim nə istəyirsə, desin. Mənim onlara cavabım gördüyüm işlərlə olacaq”.

 

Qeyd edək ki, Gülnarə Cəmaləddin Yardımlı rayonunda anadan olub. O, Sumqayıt Dövlət Universitetini bitirib. 1988-ci ildən Sumqayıtda fəaliyyət göstərən Əli Kərim adına "Dəniz” ədəbi birliyinin, 2000-ci ildən Azərbaycan Yazıçılar Birliyinin üzvüdür. ”Gileyliyəm” adlı ilk şeiri 1989-cu ildə "Sumqayıt" qəzetində çap olunub. Sonralar Dünya Gənc Türk Yazarlar Birliyinin tərtib etdiyi "Türkün səsi", Azərbaycan Yazıçılar Birliyinin Sumqayıt bölməsinin tərtib etdiyi "Bizdən sizə qalan sözdür" almanaxlarında "Ulduz", "Azərbaycan" jurnallarında və digər mətbu orqanlarında şeirləri ilə çıxış edib. 2010-cu ildə isə Türkiyədə çıxan "Çağrı" dərgisində şeirləri çap edilib. Gülnarə Cəmaləddin "Qəhvə rəngi" adlı şeirlər kitabının müəllifidir. 1999-cu ildən son təyinata kimi Azərbaycan Yazıçılar Birliyində məsləhətçi vəzifəsində işləyib.