Sumqayıtın ədəbi ictimaiyyətinin, həmçinin Xızı və Siyəzən rayonlarının nümayəndələrinin, şairlərinin iştirakı ilə keçirilən tədbiri Əli Kərim adına Poeziya klubunun sədri, Sumqayıt Poeziya Evinin direktoru İbrahim İlyaslı açaraq, şair Ağasəfanı əlamətdar yubileyi və yeni kitablarının nəşri münasibətilə təbrik etdi.

Tədbirin aparıcısı, Azərbaycanın Əməkdar müəllimi, "Şöhrət" ordenli şairə Ofelya Babayeva yubilyarın həyat və yaradıcılığı haqqında geniş məlumat verdi. Bildirildi ki, şair Ağasəfa ilə bu görüşün Sumqayıtda keçirilməsi təsadüfi deyil. Belə ki, o, Xızı rayonunun Qarabulaq kəndində dünyaya gəlsə də, gənclik illərindən başlayaraq ömrünün ən gözəl və səmərəli, yaradıcılıqla zəngin və mənalı illərini Bakıda və Sumqayıtda yaşayıb.

Əmək fəaliyyətinə Bakı teplovoz deposunda fəhlə (1960-1962) kimi başlayaraq, sonralar geoloji-kəşfiyyat idarəsində (1962-1965) qazmaçı köməkçisi işləyən Ağasəfa (Yəhyayev Ağasəfa Qafur oğlu) M.Qorki adına Moskva Ədəbiyyat İnstitutuna daxil olduqdan sonra ədəbi redaksiyalarda çalışıb. O, 1965-ci ildən etibarən "Kirpi" satirik jurnalıvə"Azərbaycan qadını" jurnalıredaksiyalarının əməkdaşı olub, sonralar 12 il "Yazıçı" nəşriyyatında bədii tərcümə redaksiyasının böyük redaktoru, "Karvan" kitablar seriyası redaksiyasında böyük redaktor, "Ədəbiyyat qəzeti"ndəməsul katibin müavini kimi ədəbi fəaliyyət göstərib. 1993-cü ildə özünün doğma Xızı rayonuna qayıdaraq, bir-neçə il Qarabulaq kənd orta məktəbində müəllimlik edib.

Diqqətəlayiqdir ki, Ağasəfa müəllim ədəbi yaradıcılığa məhz Sumqayıtda başlayıb və "Sazım" adlı ilk şeiri də 15 yaşında ikən - 1957-ci ildə"Sosialist Sumqayıtı" qəzetindədərc edilib. O vaxtdan etibarən Bakının və Sumqayıtın ədəbi mühiti ilə qaynayıb-qarışan gənc şair dövri mətbuatda tez-tez çıxış etməyə başlayır. Azərbaycanın görkəmli şair və yazıçıları ilə - Mirzə İbrahimov, Süleyman Rüstəm, Bəxtiyar Vahabzadə, Hüseyn Arif, Nəbi Xəzri, Əli Kərim, Tofiq Bayram, Qabil Mehdiyev, Zahid Xəlil və digərləri ilə yaxından tanışlığı Ağasəfanın poetik yaradıcılığının cilalanmasına, formalaşmasına ciddi təsir göstərib. Təsadüfi deyil ki, artıq 24 yaşında ikən - 1966-cı ildə onun ilk "Yolçu yolda gərək" şeirlər kitabı işıq üzü görmüşdü. Sonralar Ağasəfa müəllim bir-birinin ardınca "Gənclik" və "Yazıçı" nəşriyyatlarında "Yaşat məni", "Ürəyimdir oxuyan", "Fikir dünyası", "Ürəyimə yatanlar", "Günəşin dalınca gedən oğullar", "Odla oynayıram", o cümlədən uşaqlar tərəfindən maraqla qarşılanan "Gombulca və Dumbulca", "Bağçada birinci gün" və s. kitablarını nəşr etdirib. Ümumilikdə 10-dan artıq kitabın müəllifidir.

1974-cü ildən Azərbaycan Yazıçılar Birliyinin, sonralar isə həm də respublika Jurnalistlər Birliyinin üzvü olan Ağasəfa müəllim eyni zamanda bədii tərcümə ilə də məşğul olaraq, Lev Tolstoyun mənzum nağıllarını, Nikolay Qribaçovun, Qafur Qulamın, İlya Selvinskinin, Sergey Vasilyevin, Boris Oleynikin, Qaysın Quliyevin və digər görkəmli şair və yazıçıların əsərlərindən nümunələr tərcümə edib. O, həm də 1981-84-cü illərdə "Ölkəm", "Azərbaycan" və "Əsrin yolu" kitablarının tərtibçisi olub.

Tədbirdə filologiya elmləri doktorları - şair Rafiq Yusifoğlu və tənqidçi Vaqif Yusifli, veteran jurnalist, "Kirpi" jurnalı redaksiyasında Ağasəfa müəllimlə birgə çalışmış Zümrüd Baloğlanova, şairlərdən Əvəz Mahmud Lələdağ, Zirəddin Qafarlı, Əyyub Qiyas, Süleyman Hüseynov, "Zərif" qadın ədəbi Məclisinin sədriXatirə Fərəcli, Sevinc Qərib, AYB-nin Sumqayıt bölməsinin sədri Gülnarə Cəmaləddin, Siyəzəndən gəlmiş şair Nəcməddin Mürvətov, Zəngilanlı şair Süleyman Həziyev, Rəfayel Laçınlı və digərləri Ağasəfanın yaradıcılığı haqqında öz fikirlərini söylədilər. Sumqayıt Poeziya Evinin əməkdaşı, sabahın ümidverici gənc şairi Elvin Əlizadə şairin şeirlərini oxudu.

Görüşün sonunda "Cabir Novruz" Mədəniyyət Fondunun prezidenti Cavanşir Qurbanov, Sumqayıt Mədəniyyət İşçiləri Həmkarlar təşkilatının sədri Şahin Şəfiyev yubilyarı təbrik edərək, ona təmsil etdikləri qurumlar adından fəxri-fərmanlar təqdim etdilər.

Şair İbrahim İlyaslının Ağasəfa müəllimə Əli Kərim adına Sumqayıt Poeziya klubunun fəxri üzvü seçilməsini təsdiq edən xüsusi vəsiqə təqdim etməsi alqışlarla qarşılandı.

Görüşün sonunda 75 yaşlı yubilyar - Bakının, Sumqayıtın ədəbi mühitindən "qaçıb" Xızıya sığınan dağlar şairi özünün yeni şeirlərini, o cümlədən böyük maraqla qarşılanan satirik şeirlərini oxudu, tədbir iştirakçılarına minnətdarlığını bildirdi və özünün "Başımda dağ havası var" və təzə çapdan çıxmış "Dözüm" kitablarını avtoqrafla oxuculara və qələm dostlarına bağışladı.

Rəhman ORXAN.

Fotolar Şakir Rəhmanındır