Sumqayıt
şəhər Mərkəzi Uşaq Kitabxanasında Sumqayıt Regional Mədəniyyət idarəsinin və Mədəniyyət
İşçiləri Həmkarlar İttifaqı Sumqayıt şəhər Komitəsinin dəstəyi ilə Xalq şairi
Məmməd Arazın 85 illik yubileyi ərəfəsində orta məktəb şagirdləri arasında
şairin şeirlərinin ən yaxşı ifaçısını müəyyənləşdirmək üçün "Azərbaycan –
dünyam mənim” adlı şeir müsabiqəsi keçirilib.
Sumqayıt Regional Mədəniyyət idarəsinin Mətbuat
xidmətindən Xeberle.com-a verilən məlumata görə, Tədbirin aparıcısı multimedia
mütəxəssisi Səbinə Qasımova XX əsr Azərbaycan ədəbiyyatının görkəmli
nümayəndəsi şair, tərcüməçi, publisist, Xalq şairi Məmməd Arazın həyatı və
yarım əsr davam edən ədəbi yaradıcılığından bəhs edərək onun Azərbaycan
poeziyasının inkişafındakı əvəzsiz xidmətlərindən danışıb.
Daha
sonra qiraət müsabiqəsi 12, 18, 31 və 38 saylı tam orta məktəbin şagirdlərindən
olan ən fəal oxucular üçün açıq elan edilib. Müsabiqədə 18 oxucunun təqdim
olunan çıxışı münsiflər heyətinin üzvləri – AYB Sumqayıt
bölməsinin sədri, şairə Gülnarə Cəmaləddin, Sumqayıt şəhər Gənclər
Kitabxanasının müdiri Sona Eminova, Sumqayıt şəhər Mərkəzi Kitabxanasının baş
metodisti Natəvan Axundova tərəfindən qiymətləndirilib.
Qiraət
müsabiqəsində ən yüksək balla 38 nömrəli məktəbin 4c sinif şagirdi Əminə
Bağırova "Vətən desin” şeiri ilə birinci yerə, 31nömrəli məktəbin 3A sinif
şagirdi Nuray Məmmədli "Azərbaycan” şeiri ilə ikinci yerə, 12 saylı məktəbin 4B
sinif şagirdi Aylin Nəbiyeva "Yaşat məni” şeiri ilə üçüncü yerə layiq görülüblər.
Qaliblərə müsabiqə təşkilatçılarının fəxri fərman və hədiyyələri təqdim edilib.
Mərkəzi
Kitabxananın metodisti Natəvan Axundova qiraət müsabiqəsinə yekun vuraraq
qalibləri təbrik edib, tədbirin yüksək səviyyədə təşkili üçün MKS adından
kitabxana rəhbərliyinə və maddi dəstəyə görə isə Respublika Mədəniyyət İşçiləri
Həmkarlar İttifaqı Sumqayıt şəhər Kоmitəsinə minnətdarlığını bildirib.
Daha
sonra çıxış edən Gənclər Kitabxanasının müdiri Sona Eminova Məmməd Arazı ədəbi
və ictimai fəaliyyətindən danışıb.
Sonda
çıxış edən Mərkəzi uşaq kitabxanasının müdiri Nailə Tağıyeva tədbirin
hazırlanıb ərsəyə gəlməsində yaxından köməyi olan 12, 18, 31 və 38 saylı
məktəblərin kitabxanaçılarına öz dərin təşəkkürünü bildirib, müsabiqədə yer tutan
şagirdləri təbrik edib, yer tutmayan şagirdlərə isə yeni-yeni uğurlar
arzulayaraq ruhdan düşməmələrini tövsiyə edib.
Xəbərdən istifadə edərkən istinad etmək vacibdir.
