Söhbət Kaliforniya ştatının San-Xose şəhərində yerləşən Vinçesterlərin evindən gedir. Əfsanəyə görə, Sara adlı xanım silahqayırma fabrikinin sahibinin oğlu ilə ailə həyatı qurur. Cütlük xoşbəxt ömür sürür. Lakin bir müddət sonra qızını, daha sonra isə həyat yoldaşını itirərək 20 milyon dollarlıq mirasla tək qalan Sara dəli olmaq həddinə çatır. Görücü yanına gedərək dərdinə çarə tapılmasını xahiş edən qadın eşitdiklərindən şoka düşür. Görücü ailənin lənətləndiyinin və ərinin hazırladığı silahla qətlə yetirlimiş insanların ruhlarının evdə dolaşaraq onlardan qisas aldığını deyir. Sonda isə Saraya şəhəri və evi tərk etməyi, başqa bir yerdə ev alıb ömrünün sonuna kimi o evdə tikinti işi aparmağı tövsiyə edir. Əks halda ölüm qaçılmazdır. Elə həmin gün San-Xoseyə köçərək ev tikməyə başlayan Sara, ömrünün sonuna kimi yəni 38 il inşaat işlərini davam etdirir. Bu gün yüzlərlə turist bu sirli məkanı ziyarət edir. Hətta bəzi turistlər qapıların öz-özünə çırpıldığını, evdən ayaq səslərinin gəldiyini də iddia edirlər.

Qorxulu məkanlardan biri də Ontarioda, Niagara şəlaləsinin yaxınlığındakı Çığırtı tunelidir. Rəvayətə görə, vaxtilə tunelin yaxınlığında kiçik bir ev olub. Lakin günlərin birində evdə yanğın baş verir, paltarları alovlanan kiçik qız isə evdən tunelə doğru qaçaraq gözdən itir. O gün bu gündür həmin qızı gördüm deyən olmur.  Deyilənlərə görə, tunelin ortasında kibrit yandırılan zaman qızın qışqırığını eşitmək mümkün olur.

Paranormal hadisələrin həvəskarı olanlar çox güman ki San-Dieqoda yerləşən Koronado mehmanxanası haqda məlumatlıdırlar. 1982-ci ildə mehmanxanaya gənc qadın gəlir. Deyilənə görə, əri gəlib onu mehmanxanadan götürməli imiş. Lakin günlərlə gözləməsinə baxamyaraq, əri gəlib çıxmaq bilmir. Günlərin birində isə gözü yolda olan qadının mehmanxanadan meyidi tapılır. Ölümünün səbəbi isə müəmmalı  olaraq  qalır. Elə həmin gündən otelə işçiləri, gələn qonaqlar otaqlarda qara libaslı qadın gördüklərini deyirlər. Təbii ki, otel haqqında bu cür əfsanələr, rəvayətlər kifayət qədər olsa da, bunların həqiqətə nə dərəcədə uyğun olub-olmadığını demək çətindir.(atv.az)