Azərbaycan Milli Konservatoriyasının nəzdində Sumqayıt Musiqi Kollecinin, Müdafiə Nazirliyinin N saylı hərbi hissəsinin və Sumqayıt şəhər Səməd Vurğun adına Mərkəzi Kitabxanasının birgə təşkilatçılığı ilə hər il ənənəvi olaraq Milli Musiqi Gününə həsr olunmuş tədbir həyata keçirilib.
Azərbaycan Respublikasının suverenliyi uğrunda canından keçmiş şəhidlərin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsindən sonra Sumqayıt Musiqi Kollecinin direktoru, sənətşünaslıq üzrə fəlsəfə doktoru, Tərəqqi medalçısı, dosent Səbinə Mehdiyeva qonaqları salamlayaraq bu əlamətdar gün barədə geniş nitq söyləyib.
Tədbirdə Milli Musiqimizin tarixindən, görkəmli bəstəkar Üzeyir Hacıbəylinin həyatından, onun Azərbaycan musiqisinin inkişafı və dünyaya tanıdılması istiqamətindəki əvəzsiz rolundan, ölkədə Milli musiqi günü keçirilməsi ənənələrindən danışılıb, mədəniyyətimizin dünyada tanınması və təbliği istiqamətində ölkə başçısı İlham Əliyevin və Birinci vitse-prezident, Heydər Əliyev Fondunun prezidenti Mehriban Əliyevanın fəaliyyətindən söz açılıb.
Sonra hərbi hissənin orkestri və musiqi məktəbinin şagirdlərinin ifasında konsetr proqramı nümayiş etdirilib.
Kollecin rəhbərliyi Milli Musiqi Gününə həsr olunmuş tədbirdə iştiraklarına görə Müdafiə Nazirliyinin "N" saylı hərbi hissəsinin hərbi orkestrinin rəis müavini və dirijoru baş leytenant Emin Həsənova və Sumqayıt şəhər MKS-in direktor vəzifəsini müvəqqəti icra edən Təranə Hüsiyevaya təşəkkür edib. Tədbir zamanı kitabxananın kitab sərgisi də təşkil olunub.
Xəbərdən istifadə edərkən istinad etmək vacibdir.
