Sumqayıt şəhəri təkcə təmiz parkları və geniş küçələri ilə deyil, həm də bilikli, bacarıqlı və sənətə bağlı gəncləri ilə seçilir. Təhsil və incəsənəti eyni anda uğurla davam etdirən şagirdlər arasında Bayramova Əsma Orxan qızı da var. O, İsmət Qayıbov adına 1 nömrəli tam orta məktəbin və eyni zamanda Səid Rüstəmov adına 3 nömrəli incəsənət məktəbinin vokal şöbəsinin fəal və istedadlı şagirdlərindəndir. Xeberle.com-un əməkdaşı Əsma ilə etdiyi səmimi müsahibədə onun musiqiyə olan sevgisindən, təhsil yolundan və gələcək arzularından danışıb:
- Özünü bizə bir az təqdim edə bilərsənmi?
Mən Bayramova Əsma Orxan qızıyam. Sumqayıt şəhəri İsmət Qayıbov adına 1 nömrəli tam orta məktəbdə təhsil alıram. Məktəbimi çox sevirəm, çünki burada məni sevən sinif yoldaşlarım və mehriban müəllimlərim var. Bundan əlavə, Səid Rüstəmov adına 3 nömrəli incəsənət məktəbində vokal üzrə təhsil alıram.
- Həm ümumi, həm də musiqi məktəbində təhsil almaq çətin deyil? Necə çatdırırsan?
Bəli, bu bir qədər yorucu ola bilər. Məktəbdən çıxıb tələsik musiqi məktəbinə çatmaq bəzən çətinlik yaradır. Amma bu rejimə uyğunlaşmağı bacarıram və hər iki sahədə balansı qorumağa çalışıram.
- Ən çox sevdiyin fənn hansıdır və niyə?
Ən çox sevdiyim fənlər Azərbaycan dili və İngilis dilidir. Ana dilimiz olan Azərbaycan dilini dərindən anlamaq mənə zövq verir. İngilis dilinə isə aksentlə bağlı həssaslığım və ümumilikdə dil öyrənməyə marağım var. Amma musiqi mənim üçün bu fənlərin hamısından üstündür – çünki musiqi mənim ruhumun qidasıdır.
- Musiqiyə marağın necə başladı?
Musiqiyə olan marağım uşaqlıqdan formalaşmağa başladı. Anam hər zaman retro musiqilərə böyük önəm verib və bəstəkarların yaradıcılığını sevə-sevə dinləyib. Onun bu marağı mənə də təsir etdi. Beləcə, bu mahnılara qulaq asa-asa onları əzbərləməyə və oxumağa başladım.
- Vokal sahəsinə yönəlməyin necə baş verdi?
Əslində, musiqi məktəbinə getməzdən əvvəl "vokal" anlayışı mənim üçün tam aydın deyildi. Amma dərslərə başladıqdan sonra müəllimlərimin yönləndirməsi ilə bu sahəyə marağım artdı və özümü bu istiqamətdə inkişaf etdirməyə başladım.
- Ən çox ifa etməyi sevdiyin mahnı hansıdır?
Dəqiq bir mahnı seçmək çətindir, çünki çox sevdiyim mahnılar var. Hisslərimə uyğun olaraq müxtəlif mahnılar ifa etməkdən zövq alıram.
- Gələcəkdə hansı səhnələrdə çıxış etməyi arzulayırsan?
Gələcəkdə bu sahəni Koreyada davam etdirməyi çox istəyirəm. Bu, mənim ən böyük xəyallarımdan biridir.
- Musiqi məktəbində ən yaddaqalan anın hansıdır?
Bir dəfə vokal sinifimizin konsertində çıxış edirdik. Keçmiş direktorumuz da tamaşaçılar arasında idi. Konsertin sonunda çıxışımı xüsusilə bəyəndiyini və səhnə davranışımı müəlliməmizə bənzətdiyini söylədi. Bu sözlər mənim üçün çox böyük qürur və motivasiya mənbəyi oldu.
- Böyüyəndə hansı peşə sahibi olmaq istəyirsən?
Gələcəkdə peşəkar musiqiçi və vokalist olmaq istəyirəm.
- Musiqi sahəsində kimləri özünə nümunə götürürsən?
Həm yerli bəstəkar və sənətkarlarımızı, həm də xarici sənətçiləri izləyir, onlardan ilham alıram. Hər biri mənim üçün ayrı bir məktəbdir.
- Əgər musiqiçi olmasaydın, hansı sahə ilə maraqlanardın?
Musiqi ilə məşğul olmasaydım, çox güman ki, jurnalist olardım. Bu sahəyə marağım və müəyyən bacarıqlarım var.
- Asudə vaxtlarını necə keçirirsən?
Asudə vaxtlarımda dostlarımla çöldə vaxt keçirməyi, sakit bir mühitdə sevdiyim musiqilərə qulaq asmağı və velosiped sürməyi çox sevirəm.
- Səncə, yaxşı vokalçı olmaq üçün ən vacib keyfiyyət nədir?
Məncə, yaxşı vokalçı olmaq üçün səs və özünə inam kifayətdir.
- Musiqi sənin həyatında nəyi dəyişib?
Musiqi həm xarici görünüş tərzimi, həm də həyata olan baxış bucağımı müsbət yöndə dəyişib.
- Sumqayıtda böyümək sənə nə öyrədib?
Sumqayıt mənə istiqanlı, vətənpərvər və mehriban olmağı öyrədib. Mən şəhərimə çox bağlı biriyəm.
- Şəhərimizdə ən çox getməyi sevdiyin yerlər hansılardır?
Bələdiyyə parkı, Göyərçin bulvarı və Nəsimi parkı uşaqlıqdan bəri sevdiyim yerlərdir. Amma ümumilikdə Sumqayıtın hər guşəsi mənə doğmadır.
- Səncə, Sumqayıtda uşaqlar üçün hansı imkanlar artırılmalıdır?
Uşaqlar üçün müxtəlif bilikləndirici və əyləncəli sərgilərin təşkili artsa, çox faydalı olar.
- Sumqayıt sənət və musiqi ilə maraqlanan gənclərə kifayət qədər dəstək olurmu?
Düşünürəm ki, musiqi məktəblərinin sayı artırılmalıdır. Bu, gənclərin istedadlarını inkişaf etdirməsi üçün daha geniş imkanlar yaradacaq.
- Əgər Sumqayıtı başqa şəhərdən gələn dostuna təsvir etməli olsan, ilk olaraq nəyi deyərsən?
Sumqayıtın təmiz və səliqəli parkları, geniş küçələri və bol oksigenli yaşıllıqları haqqında danışardım. Bu şəhər yaşamaq və inkişaf etmək üçün ideal məkandır.
-Bizə vaxt ayırdığın üçün təşəkkür edirəm.
Sağ olun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
