Bildiyimiz kimi, Sumqayıtın yeni təyin olunmuş icra başçısı ilk olaraq şəhər təhsil şöbəsinin müdiri, daha doğrusu o səlahiyyətləri icra edən Vaqif Ələkbərovu tutduğu vəzifədən azad etdi. Artıq bir aya yaxındır ki, bu vəzifəyə kimin təyin olunması ilə bağlı müxtəlif fikirlər dolaşır.

Bu posta Təbiət Elmləri Təmayüllü Gimnaziyanın direktoru Nizami Əhmədov və artıq ləğv olunmuş Azərbaycan Müəllimlər İnstitutunun Sumqayıt şəhər filialının direktori kimi çalışmış Raya Nəcəfovanın gətiriləcəyi gözlənilsə də, ehtimallar özünü doğrultmayıb.

Xeberle.com portalına daxil olan məlumata görə, Sumqayıt şəhər Təhsil Şöbəsinin yeni müdiri şəhərin hazırkı deputatlarından biri olan Leyla Abdullayeva olacaq.

Bildiyimiz kimi, artıq Leyla Abdullayeva deputatlığa namizədliyini geri götürüb. Səbəb kimi onun yeni vəzifəyə təyin olunması göstərilib. Belə ki, Yeni Azərbaycan Partiyasının mətbuat xidmətinin rəhbəri Hüseyn Paşayevin sözlərinə görə, millət vəkilinin yeni təyin olunduğu vəzifə ilə yanaşı deputatlıq fəaliyyəti göstərməsi qanunvericiliyə ziddir: "Bununla əlaqədar olaraq da o, seçki marafonundan geri çəkilib. Hansı vəzifəyə təyin olunması barədə isə heç bir məlumat verə bilmərəm. Səhv etmirəmsə, indiyə qədər Sumqayıtda orta məktəbdə çalışırdı”. Yeni Azərbaycan Partiyasının Leyla Abdullayevanın namizədlik irəli sürdüyü dairədən kimin namizəd olacağına gəlincə isə H.Paşayev deyib ki, həmin dairədən kimin dəstəklənəcəyi hələ bəlli deyil: "Seçki Məcəlləsinə müvafiq olaraq namizədin partiya, yaxud da fərdi qaydada irəli sürülməsi və prosedur qaydalarını yerinə yetirməsi fiziki cəhətdən mümkün deyil. Ona görə də həmin dairədən namizədlərin qeydə alınması bitdikdən sonra hər hansısa namizədin dəstəklənməsi barədə qərar qəbul edəcək. hazırda isə bu barədə heç bir qərar yoxdur”.

Qeyd edək ki, Leyla Abdullayeva 41 saylı Sumqayıt I Seçki Dairəsindən deputatlığa namizədliyini irəli sürmüşdü. Böyük ehtimal ki, Sumqayıt şəhər Təhsil Şöbəsinin yeni müdiri məhz o olacaq.

Sumqayıtın hakim partiyadan olan deputatlarından biri Leyla Abdullayevanın 56 yaşı var: Sumqayıt şəhər 18 saylı məktəbin direktoru 1959-cu ildə doğulub. Milli Məclisdə Mədəniyyət komitəsinin üzvüdür.

Xeberle.com