Xeberle.com-un məlumatına görə bu gün axşam saatlarında Sumqayıtın girişində yəni, "Sülh” küçəsinin sağ tərəfində yerləşən ərazidə ağacların kütləvi şəkildə kəsilməsinə başlanılıb. Dərhal əraziyə gedən əməkdaşımız xəbəri dəqqiləşdirməyə çalışıb. Əraziyə çatanda artıq ağacların bir çoxu kəsilmişdi. Ağacların kim tərəfindən və nə üçün kəsildiyini öyrənmək mümkün olmayıb. Çünki, ağac "qatilləri” artıq ərazini tərk edib, getmişdilər.

Yenə də həmişə olduğu kimi ağac kəsmə əməliyyatı axşam saatlarında, özü də şənbə gününə təsadüf edib. Əlaqədar qurumlardan açıqlama almaq üçün yeni iş gününü gözləməkdən başqa çarəmiz qalmayıb.

Ötən gün Sumqayıt şəhər icra başçısı Zakir Fərəcov Yeni Azərbaycan Partiyasının Sumqayıt şəhər təşkilatının Gənclər birliyinin üzvləri ilə görüşdə şəhərin simasında ediləcək bir sıra dəyişikliklərdən söhbət açıb. İcra başçısı bildirib ki, yaxın zamanlarda Sumqayıtın girişindən "Göyərçin” abidəsinə qədər avtomobil yolu 5 metr sağ və sol istiqamətdə genişlənəcək. Həmin yolda yerləşən obyektlər söküləcək və geniş park salınacaq.

Ehtimal edilir ki, həmin layihənin icrasına start verildiyi üçün ağacların kəsilməsinə başlanılıb. İnandırıcı deyil ki, şəhər rəhbəri ağacların kəsilməsinə rəvac versin. Hər halda burada olan ağacları başqa ərazilərə də köçürmək olar.

Mərhum prezident Heydər Əliyev demişdir ki, "Bir ağacı kəsən sanki mənim bir qolumu kəsir”. Prezident İlham Əliyev də çıxışlarında ağackəsənlərlə şəxsən özü məşğul olacağı barədə sərt bəyanatlar verib. Ancaq belə görünür ki, Sumqayıtda məmurlar nə Heydər Əliyevin, nə də İlham Əliyevin bu sözlərinə məhəl qoymurlar.

Xatırladaq ki, Sumqayıtda ağacların kütləvi şəkildə kəsilməsi birinci dəfə deyil. Belə hallar nə yaziq ki, tez-tez baş verib. Xeberle.com saytında ağac ”qatilləri” hər zaman ifşa edilib. Məsul şəxslərdən ağacların kəsilməsinin qarşısını almaq üçün tədbirlər görülməsi tələb edilib.

Ümid edirik ki, bu məsələ ilə bağlı Ekologiya və Təbii Sərvətlər Nazirliyi tez bir zamanda maraqlanacaq və şəhərə ,onun ağaclarına qarşı belə münasibət bəsləyənləri təkcə cərimələməklə kifayətlənməyəcək.

Xeberle.com

P.S. Qəribədir ki, Qərbdə geniş vüsət almasına baxmayaraq, bizdə ağacların bir ərazidən digərinə köçürülməsi, bu mümkün olmadıqda isə onların yerinə yeni tinglərin əkilməsi (tutalım, 1 kəsilən ağacın əvəzinə 10 ting) çox nadir hallarda baş verə bilər. Cənablar, sizi anlayıram, 1 ağacı kəsmək daha asandır, nəinki onu digər bir yerə köçürmək, yaxud əvəzinə 10 ting əkmək. Unutmayaq, bu şəhər bizimdir və havasını hər birimiz, hər birimizin ailəsi, uşaqları udur. Ekoloji balansın qorunması hər birimizin borcu olmalıdır. Ən azı ona görə ki, bizdən sonra gələn nəsillər bizə lənət oxumasın!