İki MTN polkovnikini intihara sürükləyən kim olub?

Milli Təhlükəsizlik Nazirliyinin Energetika və Nəqliyyat Sahələrində Təhlükəsizlik Baş İdarəsinin rəisi, general-mayor Akif Çovdarov haqda ziddiyətli xəbərlər yayılır.

Onun gah saxlanıldığı, gah da nəzarətə götürüldüyü bildirilir. Keçmiş nazirin törətdiyi qanunazidd hərəkətlərin əsas iştirakçısı olan A.Çovdarov artıq həbs edilib. Qəzet yazır ki, Çovdarov 2 gün əvvəl Baş Prokurorluğun Ağır Cinayətlərə Dair İşlər üzrə İstintaq İdarəsinin əməkdaşları tərəfindən tutulub. Onun Bakıdakı biznesini isə qardaşı Asif Çovdarov idarə edir.

Bəzi saytlar isə Akif Çovdarovun MTN-dəki vəzifəsindən azad edilməsi və tutulması barədə xəbərlərin doğru olmadığını iddia edirlər.

Əvvəllər həbsxana işçisi olan Akif Çovdarov Eldar Mahmudova ən yaxın kadr hesab olunur. Nazirin bütün gizlinləri haqda məlumatlıdır. E.Mahmudov 1993-2003-cü illərdə İqtisadi Cinayətkarlığa Qarşı Mübarizə İdarəsinin və İqtisadi sahədə Əməliyyat-Əlaqələndirmə Bürosunun rəisi vəzifəsində işləyəndə Çovdarovu həmin idarəyə, milli təhlükəsizlik naziri təyin olunanda isə özü ilə MTN-ə gətirib. A.Çovdarov da Eldar Mahmudovun kassirlərindən biri kimi tanınır. Qəzetin yazdığına görə, onun MTN-də əsas vəzifəsi Azərbaycana gələn iş adamlarını soymaq olub. Rüşvət tələb edilərək təhdid edilən həmin iş adamları da Baş Prokurorluğa və Prezident Administrasiyasına etdiyi şikayətlərində əsas fiqur kimi məhz Akif Çovdarovun adını qeyd ediblər. Bir neçə gün öncə A.Çovdarovun oğlu da Milli Məclisdəki işindən çıxarılıb

Çovdarovun işçisinin müəmmalı ölümü niyə araşdırılmayıb?

A.Çovdarovun əməlləri haqda MTN-də "təmizləmə”lər başlanmazdan illər öncə də mətbuatda yazılar dərc olunub. Onun adı "Monitor” jurnalının baş redaktoru Elmar Hüseynovun qətlinin təşkilatçılığında, jurnalist Aqil Xəlilə qarşı təşkil olunmuş təxribatlarda hallanıb.

Redaksiyamıza daxil olan məlumatda A.Çovdarovun öz işçilərinə qarşı da həddən ziyadə əzazil olduğu, onlardan aylıq haqq toplamağı tələb etdiyi bildirilir. Məlumata görə bu ilin aprelində Nərimanov rayonu, Həsənoğlu küçəsi 16 saylı binanın 7-ci mərtəbəsindən özünü ataraq intihar edən 1975-ci il təvəllüdlü Azər Namiq oğlu Əliyev A.Çovdarovun işçisi olub. MTN-in Energetika və Nəqliyyat Sahələrində Təhlükəsizlik Baş İdarəsində baş əməliyyat müvəkkili olan A.Əliyev intihar etməzdən əvvəl A.Çovdarovun qəbuluna çağırıldığı haqda da məlumat var.

Polkovnik-leytenant rütbəsi daşıyan Azər Əliyevin ölümü ilə bağlı Nərimanov Rayon Prokurorluğunda Cinayət Məcəlləsinin 125-ci – özünü öldürmə həddinə çatdırma maddəsi ilə cinayət işi başlanıb. Xüsusi xidmət zabitinin ölüm işi az sonra "cinayət tərkibi müəyyən olunmadı” qeydi ilə xitam olunub.

Nədənsə Milli Təhlükəsizlik Nazirliyində çalışan cavan bir zabitin intihar etməsinin səbəbi aydınlaşdırılmayıb. A.Əliyevin ağır xəstəliyi olmayıb, ailə vəziyyəti normal olub, iş yerindən aldığı məvacib ona orta səviyyədən bir qədər yuxarı yaşamağa imkan verib. Belə bir vəziyyətdə MTN zabitinin intihar etməsi qəribə deyilmi?

Azər Əliyevin durumu, düşdüyü və ya üzləşdiyi hansı situasiya onu belə bir yola əl atmağa sövq edib?

Əgər MTN rəhbərliyi, konkret olaraq A.Əliyevin birbaşa rəisi A.Çovdarov işçisinin intiharının səbəbi ilə maraqlansaydı, hazırda baş əməliyyat müvəkkilinin intihar səbəbi ortada idi. Necə ola bilər ki, baş əməliyyat müvəkkili intihar etsin, amma onun ölüm səbəbi bilinməsin?!
MTN əməkdaşını yaşadığı evin eyvanından aşağı atıb öldürə bilərdilərmi?

Bununla A.Əliyevin intihar görüntüsü yaradılar, əsl cinayət intiharın kölgəsində qala bilərdimi? Məsələn, hazırda MTN-də saxlanılan məşhur qanqster Hacı Məmmədov belə "bədbəxt hadisə”ləri təşkil etdiyini məhkəməsində etiraf etmişdi. Boris Xoridoviç Ayyubov, Ukuşov Ruslan Xaydarbekoviç və Dilbər Məhəmməd qızı Novruzovanı öldürülmələri epizodu üzrə ifadə verərkən bildirmişdi ki, onları üzərinə yumşaq material dolanmış armatur parçası ilə döyərək öldürüb. Bundan sonra isə hər üçünü Boris Ayyubovun "Linkoln” markalı İ 4601 Çİ dövlət nömrə nişanlı maşınına – Boris Ayyubovu sükan arxasına, Ruslan Ukuşevi onun yanındakı oturacağa, Dilbər Novruzovanın meyitini isə salonun arxa otaracağına yerləşdirib "Qurd qapısı”nın yuxarı hissəsindən üzü aşağı dərəyə buraxıb. Bununla da H.Məmmədov avtoqəza görüntüsü yarada bilmişdi.

MTN zabiti komitə sədrinin sifarişi ilə intihar həddinə çatdırılıb?

1 il əvvəl intihar etmiş Milli Təhlükəsizlik Nazirliyinin polkovnik rütbəsi daşıyan digər zabiti Malik Mustafayevin qardaşı Mətləb Mustafayev sensasion video yayıb. "Bizim Yol” qəzetinə təqdim etdiyi videomüraciətində Mətləb Mustafayev Əmlak Məsələləri Üzrə Dövlət Komitəsinin sabiq işçisi olduğunu, komitədən qanunsuz işdən azad edildiyinə görə məhkəməyə üz tutduğunu və bundan sonra MTN əməkdaşları tərəfindən qanunsuz həbsə məruz qaldığını deyir. Ən ilginc iddia isə MTN-nin "qara maskalı”larının komitə sədri Kərəm Həsənovun sifarişiylə onu həbs etməsi, MTN-də aparılan danışıqlar, bacısının həyətinə MTN-çilərin basqın etməsindən sonra qardaşının canına qəsd etməsidir. Şikayətçi iddia edir ki, MTN-də zabit olan qardaşı nazir Eldar Mahmudovun və digər vəzifəlilərin qəbulundan çıxdıqdan sonra evində intihar edib.

31 ilin MTN zabitinin özünü öldürməsinə qədər, qardaşının həbsinin gizlinləri də, bu gün MTN-də baş verənlərin fonunda aktuallığını qoruyur. Ən diqqətçəkən məqamlardan biri də hər 2 polkovnikin ölüm işlərinin "cinayət tərkibi olmadığı” qeydi ilə xitam olunmasıdır.
Azər Əliyevin ölümündə belə bir ssenari ola bilərdimi?

MTN rəhbərliyinin 40 yaşlı Azər Əliyevin intiharının açılmasına maraq göstərməməsi də xüsusi maraq doğurur.

Təəssüf ki, Nərimanov Rayon Prokurorluğunda polkovnik-leytenant rütbəli MTN zabiti Azər Əliyevin ölümünə sıradan bir intihar olayı kimi yanaşıb ölüm faktına görə başladılan cinayət işinə xitam verməklə bir kənara qoyublar.

5 ay fərqlə MTN-in 2 polkovniki intihar edir və hər 2 intihar işi eyni nəticə ilə arxivə atılır. Bu, təsadüfidir?

MTN-in Xətai rayon Şöbəsinin rəisi işdən qovuldu

Milli Təhlükəsizlik Nazirliyinin(MTN) Xətai Rayon Şöbəsinin rəisi Rafiq Hümbətov işdən çıxarılıb. R.Hümbətov Akif Çovdarovun bacısının kürəkənidir. 1972-ci il təvəllüdlü Rafiq Hümbətov A.Çovdarovun himayəsi altında tez bir zamanda MTN-də irəli çəkilənlərdəndir. 2010-cu ildə MTN-in Astara şöbəsinə rəis təyin olunan R.Hümbətov 2015-ci ilin fevralında qurumun Xətai rayon şöbəsinə rəis təyin olunub. Deyilənə görə, onu MTN-ə şöbə rəisi aparmaq istəyirmişlər.

Qaynağımız deyir ki, A.Çovdarova güvənən R.Hümbətov özünü tutduğu posta uyğun aparmayıb, bir çox qanunsuzluqlara imza atıb. Onun "MTN işi” üzrə istintaqa cəlb edilməsi haqda da məlumat var.

Aldığımız digər məlumatda deyilir ki, MTN-dəki "təmizləmə”lər A.Çovdarovun 1-ci müavini Qorxmaz Hüseynova da çatıb. Vaxtilə MTN-in nəzdindəki Xüsusi İdarədə çalışmış Q.Hüseynov sonradan İdman Akademiyasına prorektor təyin olunub. Namiq Abbasov milli təhlükəsizlik naziri olarkən Q.Hüseynov geri dönmək istəsə də, N.Abbasov onun uyğun kadr olmamasını əsas gətirərək buna imkan verməyib. Eldar Mahmudov nazir təyin olunandan sonra isə MTN-in qapıları Q.Hüseynovun üzünə açılıb. Sabiq nazirlə qohumluq əlaqələri sayəsində o, böyük bir idarənin rəis müavini postuna təyinat alıb. Eldar Mahmudovun əsas kadrlarından olan A.Çovdarov MTN-dəki yığımların başında dayanan əsas 2-3 şəxsdən biri olub. Q.Hüseynov onun 1-ci müavini olmaqla yığımlarda iştirak edib.

A.Çovdarovun MTN-də peşəkar kadrların qənimi kimi ad çıxarması haqda da bilgilər var. O, istədiyi şəxsi MTN-də işə götürə və ya əksinə, gözünə xoş görünməyən şəxsi işdən çıxarmaq səlahiyyətində olub. Qeyd edək ki, bir qədər əvvəl A.Çovdarovun bacısının kürəkəni R.Hümbətovun əməllərindən şikayətçi olan həmkarlarından biri qafqazinfo-ya danışmışdı. Demişdi ki, A.Çovdarov onu gözlənilmədən Astaraya MTN-nin rəisi təyin etdirib.
Həmin yazıdan sitat: "Həmin vaxt mən Astarada Rafiq Hümbətovla işləyirdim. Bu adamın ayıq günü olmurdu. Demək olar ki, hər gün içirdi. Astaranın Kələdəhnə kəndində ”Ceyhun” restoranı vardı. Bura faktiki olaraq əxlaqsızlıq yuvası kimi fəaliyyət göstərirdi. Rafiqin günü i?də yox, həmin restoranda keçirdi. Bir dəfə içkili şəkildə idarə etdiyi xidməti avtomobillə də inək vurmuşdu. Onun əməlləri o qədər narahatlıq yaratmışdı ki, həmin vaxt Astara icra başçısı olan Mahir Quliyev iclas keçirdi və bizim rəisə xəbərdarlıq etdi. Lakin heç nə onun vecinə deyildi. Həmin vaxt onun rütbəsi polkovnik-leytenant idi”.

Çovdarovun "vuran əlləri”

Xəbər verdiyimiz kimi, idarədə oktyabrın 29-da başlanılan yoxlamaların nəticəsi olaraq A.Çovdarova tabe olan 3 şöbə rəisi Səlim Məmmədov, Akif Əliyev və Rəsul Rəsulov vəzifələrindən uzaqlaşdırılıblar. Bu şəxslər A.Çovdarovun "vuran əlləri” hesab olunurdu.

S.Məmmədov A.Çovdarovun himayəsi altında narkotik və insan alveri işlərində pul yığmaqla ad çıxarıb, R.Rəsulov haqq qoyan olub, A.Əliyev əvvəllər Çovdarovun köməkçisi olub, sonradan isə o da digər şöbələrin rəisləri kimi var-dövlət toplamaqla məşğul olmağa başlayıb.
/Musavat/