Sumqayıt şəhərində icra başçısı dəyişikliyi baş verəndən sonra mütəmadi olaraq kadr islahatları da həyata keçirilir. Xatırlayırsınızsa, əvvəlki kadr dəyişiklikləri barədə məlumat vermişdik. Bu dəyişikliklər başçının müavinləri səviyyəsində də davam edir. Belə ki, icra başçısının birinci müavini - Rövşən Sadıxovun işdən azad olması son olmayıb.Xeberle.com məlumat verir ki, onun ardından - İctimai-siyasi və humanitar məsələlər şöbəsinin müdiri, İcra Başçısının müavini Elgin Şirin oğlu Həbibullayevin tutduğu vəzifədən azad edilməsi ilə bağlı məlumat yayılıb. İcra başçısının müavininin öz ərizəsi ilə işdən çıxdığı bildirilir.
Qeyd edək ki, E. Həbibullayev Eldar Əzizov Gəncə şəhər İcra Hakimiyyətinin Başçısı işlədiyi dövrdə onun köməkçisi olub. Eldar Əzizov 2011-ci ildə Sumqayıta İcra Başçısı təyin olunanda E. Həbibullayev əvvəlcə yenidən köməkçi, sonra isə müavin vəzifəsində çalışıb. 
İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Əbülfəz Hüseyn oğlu Əbilovun da tutduğu vəzifədən azad olunduğu deyilir. Onun işdən çıxarılmasına səbəb kimi yaş senzi göstərilir. 
Məsələ ilə əlaqədar İcra hakimiyyətinin İnformasiya təminatı və təhlil sektorunun müdiri Ənvər Hüseynovla  əlaqə saxladıq. Ə. Hüseynov Xeberle.com-a bildirdi ki, bununla bağlı onda hər hansı bir məlumat yoxdur: "Əgər belə bir məsələ varsa gün ərzində əlavə məlumat veriləcək."
Xeberle.com