Afət Yaqubova
Sizi bilmirəm, məni 93-də bayıra çıxa bilməyənlərin dərdi götürüb. Çünki 93-də bayıra çıxa bilməyənlər 2016-da da çıxa bilməyəcəklər.
Bilirsiz, 93-də onlar niyə bayıra çıxa bilmirdilər? Ona görə yox ki, ölkədə hakimiyyət yox idi, küçələrdə partapart bir-birini vurub öldürürdülər... Ona görə ki, onlar yaxşı yaşayırdılar. Amma böyük bir insan kütləsi işsiz, bir qarın ac, bir qarın tox yaşayır, köhnə-kürüş paltarlarda gəzir, üz-gözlərindən kədər və qayğı yağırdı. Belə vəziyyətdə küçədəki hər yoxsul insanı özlərinə, əmlaklarına, sovet hökumətindən özlərinin və dədə-babalarının oğurladığı var-dövlətə təhlükə sayırdı 93-də küçəyə çıxa bilməyənlər. 
93-də küçəyə çıxa bilməyənlər 88-də də küçəyə çıxmamışdılar. Onlar 88-də küçədə nə olduğunu Rusiya telekanallarından xəbər tutmuşdular. Nə eşitmişdilər, nə görmüşdülər, nə başa düşmüşdülər... bir özləri bilir.
93-də küçəyə çıxa bilməyənlər 90-da da küçəyə çıxmamışdılar. Çıxsaydılar, əl-ələ tutmuş gənc həmvətənlərinin üstündən tankla keçənlərin dilini bilməkəri ilə fəxr etməzdilər.
93-də küçəyə çıxa bilməyənlər 91-də də, 92-də də çölə çıxmamışdılar. Çıxsaydılar, küçələrdə insanların övladlarını əsgər yola salıb, şəhid qarşıladıqlarını görərdilər. Özlərinə gələn hərbi komissarlıq çağırışlarına səs verərdilər.
Qarşıdan imtahan dolu bir il gəlir. Görək 2016-da küçəyə kim çıxa biləcək?!