Şəhidlər torpağa tapşırıldı.

Cəbhədə gedən döyüşlərdə həlak olan polkovnik-leytenant, 1972-ci il təvəllüdlü Raquf İbrahim oğlu Orucov və müddətdən artıq həqiqi hərbi xidmət qulluqçusu, 1989-cu il təvəllüdlü Murad Vaqif oğlu Məmmədov Sumqayıt şəhər Şəhidlər Xiyabanında torpağa tapşırılıb.

Sumqayıt şəhər sakinləri olan hər iki şəhidin cənazəsi ötən gün yaşadıqları evlərə gətilib.

Bu gün isə Sumqayıt şəhər Şəhidlər Xiyabanında dəfn mərasimi keçirilib. Mərasimdə Sumqayıt şəhər İcra Hakimiyyətinin Başçısı Zakir Fərəcov, millət vəkilləri və ictimaiyyət nümayəndələri iştirak ediblər.

Minlərlə şəhər sakini şəhidlərin cənazəsini qarşılamaq üçün küçələrə axışıblar. Sumqayıt sakinləri qəhrəman oğulların böyük qürur və iftixar hissi ilə qarşılayıblar. Sumqayıtlılar hər an Azərbaycan əsgərinin yanında olduqlarını, Azərbaycan Respublikası Silahlı Qüvvələrinin Ali Baş Komandanı əmr verərsə, ön cəbhəyə gedib doğma torpaqlarımızı azad edənədək vuruşmağa hazır olduqlarını bildiriblər. Səməd Vurğun küçəsi boyunca Şəhidlər Xiyabanına doğru yürüş edən minlərlə şəhər sakini "Şəhidlər ölməz, Vətən bölünməz”, "Yaşasın Qarabağ, yaşasın Azərbaycan!”, "Qarabağ bizimdir, bizim olacaq” şüarları səsləndirilib.
Sonra şəhidlərimizin ruhuna dualar oxunub və qəhrəmanlarımız dəfn olunublar.
Xeberle.com