Xəbər verdiyimiz kimi, Sumqayıt şəhər 1 nömrəli Doğum evində ölüm hadisəsi qeydə alınıb.
Belə ki, şəhər sakini, 1965-ci il təvəllüdlü Ceyran Abdullayeva qarın boşluğunda ağrılarla bağlı Sumqayıt şəhər 1 nömrəli Doğum Evinə müracət edib. O, bir gün sonra xəstəxanada dünyasını dəyişib.
Hadisəylə bağlı 1 nömrəli Doğum evinin baş həkimi Təranə Rəcəbli Xeberle.com-a ölüm faktının təfərrüatını açıqlayıb: "1965-ci il təvəllüdlü Ceyran Abdullayeva ginekoloji xəstə olub və oktyabrın 8-də əməliyyat üçün müraciət edib. Əməliyyat öncəsi lazımi bütün hazırlıqlar həyata keçirildikdən sonra pasient xəstəxanaya daxil olduğu gün uşaqlığın düyünlü simptomlu fibranomiyası diaqnozu ilə əməliyyata alınıb. Əməliyyatdan sonrada xəstənin vəziyyəti stabil olub və xəstə aktivləşdirilərək bir sutka reanimasiya şöbəsində qaldıqdan sonra ginekoloji şöbəyə yerləşdirilib. Lakin gecə saat 02:30-da xəstənin vəziyyətində ağırlaşma müşahidə edilib və həmin şöbənin tibbi briqadası xəstəyə lazımi yardım göstərib, həmçinin kardioloji briqada da çağırılıb. Müşahidələrimizə görə xəstədə kardioloji çatışmazlıq olub və tənəffüsündə problem yaranıb. Bütün lazımi yardımlar edildikdən sonra xəstə xüsusi nəzarət altında olsun deyə yenidən reanimasıya şöbəsinə qaytarılıb. Buna baxmayaraq, ötən gün axşam saat 18:00-19:00 radələrində xəstənin vəziyyəti yenidən pisləşib. Ürək-damar çatışmazlığı ağır həddə çatdığı üçün xəstəyə kömək etmək mümkün olmayıb. İlkin diaqnozlara görə xəstə tronbo emboliya, yaxud da tronboz, kəskin ürək-damar çatışmazlığına görə vəfat edib. Lakin dəqiq səbəblər Səhiyyə Nazirliyinin Məhkəmə Tibbi Ekspertiza və Patoloji Anatomiya Birliyinin verdiyi rəydən sonra məlum olacaq”.
Faktla bağlı Sumqayıt şəhər Prokurorluğunda araşdırma aparılır.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
