Xəbər verdiyimiz kimi, Sumqayıtda 1958-ci ildən istifadəyə verilən 9 nömrəli orta ümumtəhsil məktəbinin binası sökülərək, yerində yeni məktəb binası inşa olunacaq. Məktəb isə fəaliyyətini dayandırmış "İstək" liseyinin binasına köçürülür.
Xeberle.com-a daxil olan məlumatda məktəbin mövcud avadanlıqlarının digər bir binaya köçürülməsi zamanı bəzi inventarların - parta və parketlərin məktəb direktorunun müavini Bəhram İsmayılov tərəfindən satıldığı iddia olunur.
İddiada adı hallanan 9 nömrəli məktəbin direktor müavini Bəhram İsmayılov Xeberle.com - a açıqlamasında isə yayılan məlumatların həqiqəti əks etdirmədiyini deyib: "Söküntü işləri başlanılması üçün məktəbin bütün avadanlıqları boşaldılır və aktlaşdırılaraq ehtiyacı olan məktəblərə verilir. Sənədləşdirərək digər məktəblərə göndərdiyimiz avadanlıqların siyahısı bizdədir və bu barədə rəhbərliyin də məlumatı var. Heç bir avadanlıq satılmayıb, bu barədə yanlış məlumat yayan şəxsləri də məhkəməyə verəcəyik”.
Sumqayıt Təhsil Şöbəsindən isə bildirilib ki, araşdırma aparılır və əlavə məlumat veriləcək.
Xatırladaq ki, ki, Prezident İlham Əliyevin sərəncamı ilə Sumqayıt şəhərində 1176 şagird yerlik yeni ümumtəhsil məktəbi binasının tikintisi məqsədilə Azərbaycan Respublikasının 2018-ci il dövlət büdcəsində nəzərdə tutulmuş Prezidentin ehtiyat fondundan Təhsil Nazirliyinə ilkin olaraq 1 milyon manat ayrılıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
