Bəs niyə hər il havaların soyuması ilə əlaqədar dəm qazı zəhərlənmələri vüsət alır? Zəhərlənmədən necə qorunmaq olar? Bunun günahı kimdədir?

Ötən gün də Sumqayıtda "səssiz ölüm" ana və 5 yaşlı övladının canını aldı. Məsələnin aktuallığını nəzərə alaraq bununla bağlı kiçik araşdırma apardıq. Sumqayıt Təcili və Təxirəsalınmaz Tibbi Yardım Stansiyasının baş həkim İlkin Namazov Xeberle.com-a açıqlamasında bildirib ki, dəm qazı zəhərlənməsi artıq mövsümi xarakter alıb.

Baş həkimin sözlərinə görə, tək bu ilin ilin 11 günü müddətində 35 qazdan zəhərlənmə halı olub ki, bunun da 4- ü meyit olaraq qeydiyyata düşüb. Xəstəxanada müalicə alan 21 nəfərdən 4- ü uşaqdır, 8 nəfəri isə müalicədən imtina edib.

Bakı şəhər 1 saylı Şəhər Kliniki Xəstəxanasının Toksikologiya Şöbəsinin müdiri Azər Maqsudov Xeberle.com- a məlumat verib ki, ilin əvvəlindən bu günədək dəm qazından zəhərlənmə ilə 26 müraciət olub ki, onlardan 4- azyaşlı olmaqla 18 nəfəri xəstəxanaya qəbul olunub, ölüm faktı isə qeydə alınmayıb.

A.Maqsudov həmçinin dəm qazından zəhərlənmələrdə ilkin yardımla bağlı öz tövsiyələrini də verdi:

"Hadisələrin əksəriyyəti hamam otaqlarında baş verdiyi üçün ilk öncə xəstənin huşu üstündədirsəqapalı şəraitdən açıq havaya çıxarmaq lazımdır, lakin dəm qazından zəhərlənən xəstənin bədən temperaturu aşağı düşdüyü üçün zərərçəkənin bədənini və başını isti bir şeylə bükmək lazımdır. Sonrada isə qanın dövriyyəsinin bədəndə artmasını təmin etmək üçün isti içkilər içirmək vacibdir. Amma artıq xəstə huşunu itiribsə, mütləq həmin an zərərçəkən mühitdən uzaqlaşdırılmalıdır. Sonra isə ağız boşluğu selikdən təmizlənməli, nəfəsini bərpa etmək və tez bir zamanda həkim nəzarətinə çatdırmaq lazımdır. ”

Bəzi ekspertlər əhaliyə verilən qazın tərkibində zəhərli elementlərin olduğunu da israr edir. Məişətdə istifadə olunan qaza əlavə maddələr qatılmalıdır ki, zəhərlənmə baş verməsin. Amma deyəsən, qazın tərkibi təmizlənmir, zəhərlənmələr də elə bundan baş verir. Elə qazın rəngində də dəyişiklik var. Əvvəllər işlətdiyimiz qaz mavi rəngə çalırdı, indi isə qırmızıdır.

Sumqayıt Qaz İstismar Sahəsinin baş mühəndisi Teymur Baliyevisə iddialarla razı deyil. T. Balıyev Xeberle.com-a bildirdi ki, mavi qazdan zəhərlənmələrin səbəbi dəm qazıdır, qazın tərkibi deyil: "Bir kub metr qazın yanması üçün 10 kub metr hava lazımdır. Bağlı mühitlərdə isə yanma yaxşı getmir və karbon qazı əmələ gəlir ki, bu da zəhərlənmələrə səbəb olur”.

Baş mühəndis onu da vurğuladı ki, mənzillərə verilən qaz xətlərində sızma yoxdur və belə hallar müşahidə olunan zaman dərhal müdaxilə olunur və sızmalar aradan qaldırılır: "Bu gün dəm qazından zəhərlənmələrin basilica səbəbi isə hamam otaqlarında nəfəsliklərin qapalı olması və tüstü bacalarının düzgün quraşdırılmamasıdır. Bu haqda FHN –nin əməkdaşları əhali arasında mütəmadi olaraq marifləndirmə işləri aparsa da məsələyə hələ də məsuliyyətsiz yanaşan vətandaşlar var. Əfsuslar olsun ki, məsuliyyətsizliyin nəticələri də faciə ilə başa çatır”.

Xədicə Səxavətqızı

Xeberle.com