Bildiyimiz kimi, martın 13-ü saat 10:00-dan etibarən Təhsil Nazirliyi tərəfindən bütün Respublika orta ümumtəhsil məktəblərinə şagirdlərin elektron qaydada sənəd qəbuluna başlanılıb. Nöqsanlar və neqativ hallar çox zaman qaçılmazdır desək, yanılmarıq. Təhsil Nazirliyi internet vasitəsilə müraciət edəcək valideynlərin həyəcanla bu tarixi gözləməsini bilə-bilə martın 13-də www.mektebeqebul.edu.az saytı öncə saat 08:55-dən aktivləşdirilib və bir çox valideynlər qeydiyyatdan keçərək övladlarının seçdiyi məkəblərə qəbul olunması barədə təsdiq kodunu da alıblar. Lakin bir müddət sonra bildirilib ki, bu, sınaq məqsədi ilə atılmış bir addım olub və birinci sinfə sənədlərin qəbulu təxminən 1 saat sonra, saat 10:00-da aparılacaq. Bununla da razılaşan valideyinlər yenidən qeydiyyatdan keçmək istəsələr də, budəfəki cəhdləri artıq müsbət nəticə verməyib. 10:15-də isə artıq bəzi məktəblərə qəbul dayandırılıb və qeydiyyatdan keçmək istəyənlərə yerlərin dolması ilə bağlı məlumatlar verilib.
Xeberle.com olaraq məsələni daha yaxından aydınlaşdırmaq üçün öncə Sumqayıt şəhər Təhsil Şöbəsinin müdiri Arzu Alıyeva ilə əlaqə saxladıq. Təhsil şöbəsinin müdiri faktı təsdiq etdi və bildirdi ki, Sumqayıt şəhəri üzrə birinci siniflərə elektron qaydada aparılan sənəd qəbulu zamanı yerlərin tez dolması ilə əlaqəli bəzi məktəb direktorları artıq məlumat veriblər və mən də daxil olan bu məlumatı Təhsil Nazirliyinə bildirəcəyəm. Lakin biz bu barədə başqa bir fikir bildirə bilmərik, çünki elektron qəbulu Təhsil Nazirliyi özü aparır və bizə bu barədə verilən məlumatları nazirliyə çatdıracağıq. Təhsil Nazirliyinin mətbuat katibi Cəsarət Valehov isə qısa olaraq bildirdi ki, məsələ ilə araşdırma aparılıb məlumat veriləcək.
Qeyd edək ki, bir neçə ildir ölkədə 1-ci sinfə qəbul elektron qaydada aparılır. Qəbulun elektron qaydada təşkilinin məqsədi sənədlərin qəbuluna sərf ediləcək zaman və insan resurslarına qənaət etmək, şagird kontingentinin uçotunun sistemləşdirilməsidir. Bu yenilik sayəsində valideynlər həm də məktəb haqqında məlumat əldə edə bilirlər.
Bu sistemin tətbiqi ilə məktəbə qəbul zamanı neqativ halların da tam aradan qaldırılması gözlənilirdi. Lakin bu günki məlum mənzərədən sonra bunun tam mümkün olmadığınının şahidi oluruq. Təəssüf ki, neqativ hallar hələ də var.
Xəbərdən istifadə edərkən istinad etmək vacibdir.
