Sosial şəbəkələrdə Sumqayıt 3 saylı şəhər poliklinikasında həkimlərin pasiyentdən pul almasını özündə əks etdirən görüntülər yayılıb. Videoda pasiyentdən müayinədən keçməsi üçün pul istənildiyi və konkret qiymətlərin müəyyən edildiyi görünür. Görüntülərin ötən gün çəkildiyi iddia olunur.
Məsələ ilə bağlı Sumqayıt 3 saylı poliklinikanın baş həkimi Elçin Zeynalovla əlaqə saxladıq.
Baş həkim
Xeberle.com-a açıqlamasında yayılan görüntülərin yeni olmadığını bildirib: "Bu hadisə ötən ilin dekabr ayında olub. Və görüntülərdə olan həkimlərlə müvafiq tədbirlər görülüb. Belə ki, tibb bacısı Lalə Vəliyevaya şəxsi işinə yazılmaqla şiddətli töhmət verilərək başqa işə keçirilib, həkim Cəmilə Məmmədovaya töhmət, Rentgen texnika həkimi Venera Veysəlovaya, EKQ kabinetinin tibb bacısı Nəzakət Salmanovaya və Çiçək adlı laborant-feldşerə töhmət verilib. Sözügedən məsələ mən baş həkim olmamışdan öncə baş verib. Bunu indi kim hansı məqsədlə yenidən gündəmə gətirib bilmirəm. Görüntüləri yayanı məhkəməyə verəcəyik".
Sumqayıt Səhiyyə şöbəsinin müdir əvəzi Səkinə Sadıxova isə
Xeberle.com-a açıqlamasında görüntülərlə bağlı araşdırma aparıldığını və tədbirlər görüldüyünü bildirib: "Videoçəkiliş ötən ilin dekabr ayında olub. Həmin vaxt sözügedən poliklinikanın baş həkimi işdən çıxmışdı, vəzifələrin müvəqqəti icrası müavinə tapşırılmışdı. Bu məsələ hüquq-mühafizə orqanları tərəfindən araşdırılıb. Müvafiq qaydada tədbir görülüb".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
