Xəbər verdiyimiz kimi, dövlət başçısının tapşırığına əsasən, əhalinin sosial müdafiəsinin daha da gücləndirilməsi və güzəştin şamil edildiyi əhali istehlakçılarının əhatə dairəsinin daha da genişləndirilməsi məqsədilə Tarif (qiymət) Şurasının aprelin 30-da keçirilmiş iclasında əhali üzrə təbii qazın aşağı tariflə illik istehlak həcmi 1700 kubmetrdən 2200 kubmetrədək artırılıb.
Bununla da 2200 kubmetrə qədər qazdan istifadəyə görə ödəniş hər kubmetrə görə 10 qəpikdən hesablanacaq.
Tarif Şurasının mövcud qərarı isə mûəyyən çaşqınlıq yaradıb. Belə ki, yayımlanan məlumatlarda bu il üçün bütün limitlərin sıfırlanacağı və bu gündən etibarən il sonuna qədər 2200 kubmetr qaz limitinin veriləcəyi qeyd edilib.
Bununla bağlı Cebhe.info-ya açıqlama verən "Azəriqaz” İstehsalat Birliyinin (İB) ictimaiyyətlə əlaqələr şöbəsinin rəisi İbrahim Kərbalayev bildirib ki, 22 dekabr 2016-cı il tarixli Azərbaycan Respublikası Prezidentinin tapşırığına uyğun olaraq Tarif (qiymət) Şurasının növbədənkənar iclası keçirilərək təbii qazdan istifadə üçün illik istehlak həcmi 1700 kubmetr limit tətbiq edilib:
"Dünən isə Tarif Şurası tərəfindən yenidən bu məsələyə baxılaraq illik istehsal həcmi artırıldı. Artıq bu gündən etibarən smart-kart qaz sayğaclarında aparılan ödənişlər limiti keçən istehlakçılar üçün yenə də əvvəlki tariflə, yəni 10 qəpiklə hesablanacaq. 1700 kubmetri istifadə edənlər üçün 500 kubmetr əlavə ediləcək.
Ümumilikdə isə bu qərar bütün abonentlərə, istər mexaniki qaz sayğacları, istərsə də smart-kartlardan istifadə edən istehlakçılara şamil olunacaq".
Xatırladaq ki, indiyədək əhali istehlak olunan 1700 kubmetrədək qazın hər kubmetrinə görə 10 qəpik, 1700 kubmetrdən çox istifadə üçün isə 20 qəpik ödəyirdi.
Bu gündən etibarən isə əhali 2200 kubmetrədək qazın hər kubmetrinə 10 qəpik, 2200 kubmetrdən çox olan hissə üçün isə 20 qəpik ödəyəcək.
Xəbərdən istifadə edərkən istinad etmək vacibdir.
