Uşaq sanatoriyasının fəaliyyətdə olduğu müddətdə bəzi xəstəlikləri olan uşaqların müalicəsi və inkşafında əvəzsiz xidmətləri olub. Bura ilk dövrlərdə məktəbyaşlı uşaqlara xidmət göstərilib. 1970-ci ilin əvvəllərindən isə məktəbəqədər yaşlı (1-7 yaş) çəkidən geri qalan, zəif uşaqların inkişafı proqramı tətbiq olunmağa başlayıb. 

Sumqayıt şəhərinin uzun illər baş pediatrı işləmiş Xalidə Quluyeva  Xeberle.com-a açıqlamasında bildirib ki, əsasən çəkidən geri qalan, hər hansı xroniki xəstəlikləri olan uşaqların burada müalicəsi aparılırdı:  "Bununla yanaşı, sanatoriyada müalicə alan uşaqlar gündə 3-4 dəfə yeməklə, lazımi dərman preparatları ilə  təmin olunur,  fizioterapiya edilirdi.  1983-cü ildə Sumqayıt şəhərində uşaqlar arasında kütləvi sarılıq infeksiyası yayılmışdı. Uşaq xəstəxanasının hər iki şöbəsi dolmuşdu deyə, 50-yə yaxın uşağı sanatoriyada yerləşdirəsi olmuşduq. Bu kimi xidmətlərinə görə sanatoriyanın fəaliyyəti əvəzsiz idi".

X.Quliyevanın sözlərinə görə, 1991-ci ildən isə sanatoriya əsaslı təmirə  dayandırılır. Təmir-bərpa işləri tam bitdikdən sonra tibb müəssisəsi fəaliyyətini davam etdirməli idi: "Lakin həmin vaxtlar Qubadlı rayonu işğal olunduğundan oradan gələn məcburi köçkünlər təzə təmirdən çıxmış sanatoriyaya yerləşdirildilər. Günümüzə qədər qaçqınlar sanatoriyada məskunlaşıblar və sanatoriya Sumqayıt şəhər Səhiyyə Şöbəsinin balansından çıxarılıb".

Tibb üzrə ekspert Adil Qeybulla  isə deyir ki, bu sanatoriyalar  Sovetlər dönəmində uşaqların sosial müdafiəsi və sağlamlığı üçün qurulmuş sistem idi. Sovet təbabətində əsas prinsip profilaktika idi: "Bu, bir sosial təbabət idi. Müəyyən məsələləri çıxsaq, ümumilikdə təchizat və sairə normal səviyyədə təşkil olunurdu. Amma SSRİ dağıldıqdan sonra sovet təbabətinin strukturları da dağıldı və müxtəlif sanatoriya tipli profilaktika müəssisələri dəyişdi, bəziləri statusunu itirdi, bəziləri özəlləşdirildi, bəziləri isə müəyyən statusda fəaliyyətlərini davam etdirirlər. Uşaq sanatoriyaları hansısa bir formada fəaliyyətini davam etdirməlidir,  reabilitasiya mərkəzləri şəklində və yaxud da hansısa bir istirahət mərkəzi kimi fəaliyyət göstərsələr daha məqsədəuyğun olar. Lakin strukturları dəyişilsə də, funksiyaları uşaqların sağlamlığının keşiyində durmaq olmalıdır. O baxımdan bu tipli sanatoriyalara dövlətin diqqət və qayğı göstərməsi önəmlidir. Nəzərə alsaq ki, bu gün uşaqlar arasında dayaq istinad sisteminin, yəni sümük-oynaq sisteminin xəstəlikləri yetərincədir, Azərbaycanda sklet anomaliyaları həddən ziyadə artıb, uşaq serebral iflicli xəstələri və sair var ki, bunların reabilitasiyası üçün belə sanatoriyaların fəaliyyət göstərməsi vacibdir. Uşaqlarda olan müxtəlif tənəffüs yolu xəstəlikləri, asmoid komponentli bronxitlərin və sair reabilitasiyasının əsası belə tipli sanatoriyalarda həyata keçirilsə, daha yaxşı olardı. Əlbəttə, sanatoriyaların uşaqların sağlamlığı üçün səfərbər olunması dövlətin mühüm bir qayğısı olardı. Düşünürəm ki, İcbarı Tibbi Sığorta paketi çərçivəsində bu, səhiyyənin mühüm bir strukturu olmalıdır. Ümumiyyətlə, ana və uşaqların mühafizəsi bütün dünyada əsas bir istiqamətdir. Həm sığorta paketi çərçivəsində, həm də ümumiyyətlə strateji olaraq genefondun sağlamlığı baxımından diqqət mərkəzində olan səhiyyənin əsas istiqamətlərdən biridir ki, biz hər zaman bu məsələni diqqətdə saaxlamalıyıq".

"Sumqayıt şəhərində qaçqınlar və məcburi köçkünlərin yerləşdirilməsi proseslərində sözügedən sanatoriyada məskunlaşan soydaşlarımız da yaxın illərdə yeni mənzillərlə təmin olunacaq.”  Bu sözləri  Xeberle.com-a açıqlamasında  Sumqayıt Şəhər İcra Hakimiyyətinin mətbuat katibi Eyvaz Qocayev bildirib. O qeyd edib  ki, mərhələli şəkildə aparılan işlər sırasında həmin sanatoriyada yaşayan vətəndaşlar da yeni mənzillərlə təmin olunacaq: "Bina tam boşaldıldıqdan sonra keçmiş sanatoriyanın hansı profil üzrə fəaliyyət göstərəcəyinə və hansı idarənin balansına veriləcəyinə yenidən baxılacaq".