Xeberle.com Sumqayıt şəhərinin iqtisadi, səhiyyə və təhsilin inkşafı üçün son 10 ildə dövlət büdcəsindən ayrılan pulların məbləğini araşdırıb.
2009-cu ildə isə şəhərin 60 yaşı tamam olub və bu məqsədlə 5 milyon manat vəsait ayrılıb. Görülən işlər siyahısında şəhərin abadlıq və quruculuğu, yeni məktəb binasının tikintisi, səhiyyə ocaqlarının təmir və bərpası, dam örtüklərinin yenilənməsi, yolların asfalt örtüyünün dəyişdirilməsi və sairə kimi işlər görülüb.
Məlumat üçün bildirək ki, 2011-2015-ci illər ərzində şəhərin icra başçısı olmuş Eldar Əzizovun dövründə Sumqayıt şəhərinin sosial-iqtisadi inkişafının sürətləndirilməsi və abadlıq işlərinin davam etdirilməsi məqsədi ilə 34 milyon manat vəsait ayrılıb. Şəhər üçün ayrılan pullarla 1 saylı Sumqayıt Şəhər Xəstəxanası yenidən qurularaq əsaslı təmir olunub və həmçinin də tibbi avadanlıq və inventarla təchiz olunub. Şəhərin sosial iqtisadi inkişafı yönümündə də işlər aparılıb.
2 sentyabr 2015-ci ildən - Zakir Fərəcov icra başçısı təyin olunan müddətdən indiyə qədər Sumqayıt şəhəri üçün 57.7 milyon manat vəsait ayrılıb. Sosial obyektlər tikilib, çoxmənzilli binaların sakinlərinin yaşayış şəraitinin yaxşılaşdırılması, onları narahat edən problemlərin aradan qaldırılması istiqamətində əsaslı tədbirlər həyata keçirilib. Bununla yanaşı, binaların böyük əksəriyyətinin dam örtüklərinin dəyişdirilməsi, içməli su, kanalizasiya və istilik sistemlərinin, lift təsərrüfatının yenidən qurulması sahəsində ciddi addımlar atılıb. Şəhərin giriş və çıxış yolları tam təmir olunub, yeni məktəb binasının tikintisinə başlanılıb, ümumi sahəsi 106 hektar olan bulvar salınıb və dənizkənarı bulvarın ərazisi yenidən genişləndirilir.
Beləliklə son 10 ildə "Gənclər şəhəri”nə ümumilikdə 96.7 milyon manat vəsait ayrılıb.
Bu ilin noyabrın 22-də isə Sumqayıtın şəhər statusu almasının 70 ili tamam olur.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
