Bu gün Sumqayıtın əksər avtobus
dayanacaqlarında xüsusi lövhələr quraşdırılıb. Lakin bu lövhələrdə nə
avtobusların hərəkət intervalı, nə də ki, iş saatları haqqında məlumat verilib.
Yəni dayanacaqda avtobus gözləyən bir sakin sutkanın sübh vaxtı, yaxud qaranlıq
hissəsində çətinlik çəkərək, avtobusun saat neçədən neçəyədək işləməsi barədə
tam məlumatsız qalır. Bir müddət əvvəl quraşdırılan lövhələrdə yalnız həmin
dayanacaqdan keçən avtobusların nömrələri və şəhərin planı öz əksini tapıb.
Sərnişinlərin işini asanlaşdırmaq
üçün marşrut avtobusların hərəkət intervalını öyrənmək üçün heç bir məlumatın
olmaması haqlı narazılıqlara səbəb olub.
Quraşdırılan bu lövhələrin təəssüflər olsun ki, ciddi bir faydası
olmadı, çünki istər-istəməz marşrut avtobuslardan istifadə edən vətəndaş
dayanacaqdan hansı avtobusun keçəcəyindən az-çox məlumatlı idi. Bu, əsasən şəhərin
turistlərinə daha çox fayda verə bilər. Odur ki, günümüzdə "Bakıda olduğu kimi,
dayanacaqda marşrut avtobusların zaman intervalları haqqında düzgün informasiyanı
özündə əks etdirən smart monitorlar olsa,
daha yaxşı olardı”, - deyə düşünür bir çox sumqayıtlı.
Məsələ ilə əlaqədar Sumqayıt
Avtomobil Nəqliyyatı ilə Sərnişindaşıma İdarəsinin rəisi Tofiq Saydumovla əlaqə
saxladıq. Qurum rəsmisi bildirdi ki, xəttə buraxılan avtobusların sayında
vaxtaşırı dəyişikliklər olduğu üçün həmin lövhələrə intervalla əlaqəli məlumat
yerləşdirə bilməzdilər, çünki avtobuslarda yaranan nazaslıqlar, qəzalar zamanı
bəziləri müvəqqəti olaraq xətdən çıxır və bu zaman istər-istəməz intervalda dəyişiklik
olur. Yaxud, axşam saatlarında əhalinin gediş-gəlişi az olan ərazilərdə
marşrutların sayını azaldırıq, bu zaman da intervalda dəyişiklik olur. Gecə
saatlarında olan iş qrafikinə gəldikdə isə, T.Saydımov qeyd etdi ki, bu da sərnişinlərin
gediş-gəliş sıxlığına görə müəyyənləşir. Axşam saatlarında bəzi ərazilərdə demək
olar ki, marşrut avtobusdan istifadə edən olmur deyə avtobusların sayını
azaldırıq və intervalın müddəti də uzanır.
Ümüd edirik ki, gələcəkdə bizim şəhərimizdə
də ən az paytaxtda olduğu kimi, LED monitorlar quraşdırılacaq və dayanacaqlarda
avtobusların intervalını əks etdirən lövhələr sərnişinlərin ixtiyarında olacaq.
Şəhər sakinlərinin də fikrinə görə, hazırda xeyli miqdarda vəsait hesabına
quraşdırılan "minimalist lövhə”lər isə bir işə yaramır.
Xədicə Səxavət
Xeberle.com
Xəbərdən istifadə edərkən istinad etmək vacibdir.
