Sumqayıt şəhəri Novxanı bağlarında yaşayan Laçın rayonundan məcburi
köçkün olan Qurban Tarverdiyevə məxsus fərdi yaşayış evi sökülüb.
Q. Tarverdiyev Xeberle.com-a bildirib ki, hadisə noyabrın 18-də qeydə
alınıb. Belə ki, o evdə olmadığı müddətdə söküntü işləri həyata keçirilib: "Gəlib
gördüm ki, evimi traktorun ağzına verib dağıdıblar. İçərisində olan bəzi əşyalarımıza da ziyan dəyib. 20
ildir ki, bu evi tikmişəm və burada yaşayırıq”.
O, fərdi yaşayış
evinin tikildiyi ərazinin bələdiyyə torpağı olduğunu və bütün vergiləri də
vaxtında ödədiyini deyib: "Düzdür, evin sənədi yoxdur. Amma bütün kommunal
ödənişləri və vergiləri ödəmişəm”.
Şikayətçi onların
evlərinin hər tərəfində yaşayış olduğunu və evlər tikildiyini sözlərinə əlavə
edib. Məcburi köçkün vəziyyətlə bağlı Sumqayıt şəhər İcra Hakimiyyətinə də
müraciət edib. Oradan isə Q. Tarverdiyevə bildirilib ki, icra hakimiyyəti
tərəfindən heç bir söküntü işləri aparılmayıb.
Sumqayıt şəhər
Bələdiyyə sədrinin müavini Musa Həsənov isə Xeberle.com-aaçıqlamasında vətəndaşın
ev tikdiyi torpağın bələdiyyəyə məxsus olduğunu təsdiqləyib: "Lakin evin söküntüsü üçün nə bələdiyyənin, nə də ki, digər bir qurumun qərarı olmayıb.
Problem satan və alanlar
arasında olub və qanunsuz olaraq həmin vətəndaşa məxsus ev sökülüb. Problemi
yalnız hüquq-mühafizə orqanlarının
müdaxiləsi ilə həll etmək lazımdır. Çünki evin söküntüsü üçün heç bir qanuni
sənəd və icazə olmayıb”.
Məlum olub ki, fərdi
yaşayış evi İlham adlı "makler” tərəfindən sökülüb. Belə ki, Q. Tarverdiyevin evinin
olduğu torpaq sahəsi həmin şəxsin olub və o da belə bir addım atıb. Və
Tarverdiyevin evini də sökməklə vətəndaşa külli miqdarda ziyan vurub.
Məsələ ilə bağlı İlham adlı "makler”lə
də əlaqə saxladıq, O, isə yaranan
vəziyyətə aydınlıq gətirmək əvəzinə telefonu söndürdü.
Ümid edirik ki, aidiyyatı qurumlar problemin həlli istiqamətində
müvafiq addımlar atacaq.
Xədicə
Səxavətqızı
Xəbərdən istifadə edərkən istinad etmək vacibdir.
