Zorakı hadisələrin, amansız qətllərin, dəhşətli qəzaların və intihar olaylarının Kütləvi İnformasiya Vasitələrində (KİV) işıqlandırılması, hətta bəzi media orqanları tərəfindən həddindən artıq tirajlanması ciddi müzakirə mövzularından olub. Çox vaxt psixoloqlar və ictimaiyyət nümayəndələri kriminal xəbərlərin yayılmasında mətbuatı qınayır, mediada dərc olunan pis xəbərlərin cəmiyyətdəki aqressiyanı artırdığını iddia edirlər. Bir çoxlarına görə, bu cür hadisələrin mediada geniş şəkildə işıqlandırılması intihar və zorakılığa meyilli insanları təşviq edir.
Psixoloq Rima Əyyubova Xeberle.com-a mövzunu şərh edib. O bildirib ki, bir çox xəbər saytları gündəmdə qalmaq, reytinq toplamaq naminə və ya öz orqanını tanıtmaq məqsədi ilə xüsusi başlıqlı işarələrlə bu kimi informasiyaları çəkinmədən yayımlayır:
"Düşünürəm ki, elə bu yazım media çalışanları üçün bəlkə bir stimul olar. Suala cavabım birmənalı şəkildə "Xeyr”-dir, çünki, bu cür informasiyalar bu cür halların baş verməsinə gətirib çıxaran səbəblərdən olmaq ehtimalı zənnimcə yüksəkdir. Səbəb? Səbəbi budur ki, bir çox xəbər saytları gündəmdə qalmaq, reytinq toplamaq naminə və ya öz orqanını tanıtmaq məqsədi ilə xüsusi başlıqlı işarələrlə bu kimi informasiyaları çəkinmədən yayımlayır. Bunun tamamilə yanlış olduğunu vurğulamağı özümə bir vəzifə borcu hesab edirəm. Niyə? Çünki bu davranışa meyilli, psixoloji vəziyyəti sabit olmayan və ya sabitliyi pozulan, bu davranışı yerinə yetirməklə problemlərin həllinə çıxış yolu kimi baxan kifayət sayda insanlar vardır. Bu cür xəbərlər onları bu davranışa ani qərar əsasında təhrik etməsinə səbəb ola bilər. Xüsusilə, bu kimi xəbər başlıqları və ya xəbərlər ölkəmizdə bu davranışa meylli olan həssas azyaşlılar və ya yeniyetmələr üçün tamamilə təhlükəli bir vəziyyət yaratması qaçınılmazdır. Müsahibəmdə bu hər kəsə təsir edə bilər cümləsini qeyd etməmişəm. Ona görə biraz daha diqqətli davranmağa çağırıram. Yəni demirəm ki, heç informasiyanı verməyin. Bu informasiyanı yayımlaya bilərsiniz, amma xüsusi başlıqla, insanların beyninə birbaşa təsir edəcək simvollardan uzaq durmaqla, jurnalist etikası çərçivəsində mümkünlüyünü təmin etmək olar. Yaxşı olar ki, bu davranışın özündən çox, davranışı yaradan səbəb, bu davranışın adı altında ola biləcək üstü örtülü yerini bu davranışla əvəzləyən cinayət nədirsə bunun aradan qaldırılması və ya problemin həlli istiqamətində cəmiyyəti maarifləndirmək, övladlarımızı, gələcəyimizi qorumağın yollarını aşılamaq naminə ciddi tədbirlər görülsün. Bunun isə ən yaxşı halda yaxşı yolu sosial şəbəkələr, xəbər saytlarıdır”.
Elşən Yəhyayev
Xəbərdən istifadə edərkən istinad etmək vacibdir.
