Dünya ölkələrinə sürətlə yayılan bu virus şübhəsi ilə Azərbaycanda da xüsusi nəzarət altına – karantinə alınanlar var.

Bəs görəsən Sumqayıtda necə, virusa yoluxma şübhəsi olanlar varmı?

Sumqayıt şəhər Səhiyyə Şöbəsindən Xeberle.com-a verilən məlumatda bildirilir ki, hazırda şəhərin tibb müəssisələrində koronavirus şübhəsi ilə xəstə qeydə alınmayıb. Eyni zamanda, bütün tibb müəssisələrində profilaktik və qabaqlayıcı tədbirlər görülüb: "Səhiyyə Nazirliyinin və İcbari Tibbi Sığorta Agentliyinin göstəriş və təlimatlarına əsasən şəhərin bütün uşaq və böyüklər üçün nəzərdə tutulmuş poliklinikalarında "qaynar xətt”lər yaradılıb. Poliklinikalarda virusla bağlı əlaqələndirici şəxslər təyin olunub və lazımi dərman preparatları ilə təmin olunmuş xüsusi karantin otaqları yaradılıb. 65-4-31-87, 65-5-76-41 "qaynar xətt” nömrələri 24 saat ərzində əhalinin xidmətindədir”.

Qeyd edək ki, Azərbaycanda indiyədək 3 koronavirusa yoluxma halı qeydə alınıb, eləcə də İrandan gəlib Azərbaycandan keçməklə Gürcüstana və Belarusa gedən şəxslərdə virusa yoluxma halı aşkarlanıb.

Bundan başqa ölkədə 224 nəfərin hazırda koronavirus şübhəsi ilə həkim nəzarətində olduğu bildirilir.

Bütün təhsil müəssisələrində təlim-tədris prosesi martın 3-dən 9-dək dayandırılıb.

Koronavirusla mübarizə tədbirləri üçün isə 10 milyon manat vəsait ayrılıb.

Xədicə Səxavətqızı