Gün ötdükcə Sumqayıt şəhərində koronavirus pandemiyası ilə əlaqədar vəziyyətin ürəkaçan olmadığını bildirirlər. Durumun nəzarətdən çıxması ilə bağlı fikir yürüdənlər də var.
Xeberle.com-un əldə etdiyi məlumata görə, hazırda Sumqayıt şəhərində virusa yoluxanların sayı 500-dən çoxdur.
"Əməkdaşlarımızdan virusa yoluxanlar mövcuddur, onlar birbaşa xəstələrlə təmasda olduqları üçün daha çox risk altındadırlar".
Bu sözləri Xeberle.com-a açıqlamasında Sumqayıt şəhər Səhiyyə şöbəsinin müdiri Səkinə Sadıxova deyib. Şöbə müdiri həmçinin deyib ki, Çin Respublikasından Sumqayıt şəhərinə göndərilən tibbi avadanlıqların hamısı 1 saylı xəstəxana üçün nəzərdə tutulub. "Hazırda 8 süni tənəffüs aparatımız var. Sumqayıt şəhər 1 saylı xəstəxanasında 250 tibbi personal koronavirusla mübarizə tədbirinə qoşulub və əməkdaşlarımızdan virusa yoluxanlar da mövcuddur. Yoluxan əməkdaşlarımız arasında tam sağalanlar və müalicəsini davam etdirənlər var. Tibbi personalın hər bir nümayəndəsi tez-tez müayinədən keçir. Gücləndirilmiş iş rejimində işləyən əməkdaşlar 3 aylıq əlavə əməkhaqlarını aldılar, iyun ayı da sonradan əlavə edildiyi üçün həmin ayın da maaşı onlara ödəniləcək", - deyə S.Sadıxova qeyd edib.
Xədicə Səxavətqızı
Xəbərdən istifadə edərkən istinad etmək vacibdir.
