Hazırda Azərbaycanda, xüsusilə də Bakı şəhəri və Abşeron rayonunda çoxsaylı qanunsuz tikililər mövcuddur.
Bunun
əsas səbəbi isə yerli icra hakimiyyətlərinin bu sahədə yol verdiyi
nöqsanlar və qanunsuzluqlarıdır. Vətəndaşların da bu sahəyə aid
qanunları bilməməsi həmin icra orqanlarının özbaşınalığına təkan verir.
Bu tendensiya illərdir ki, davam edir.
Maraqlıdır ki, hazırda ev tikmək istəyənlər hansı prosedurdan keçməlidirlər? Fərdi ev tikintisi sadələşdirilibmi?
Bu
barədə əmlak məsələləri üzrə ekspert Ramil Osmanlı Cebhe.info-ya
bildirib ki, fərdi yaşayış evinin tikintisi Tikinti və Şəhərsalma
Məcəlləsi və bu məcəlləyə uyğun olan digər normativ hüquqi aktlarla
tənzmilənir:
"Azərbaycanda
fərdi yaşayış evinin tikintisi məlumatlandırma icrası qaydasına aid
olan tikililərə aiddir. Yəni burada tikintiyə icazədən söhbət getmir.
Sadəcə olaraq, müəyyən normativlər var ki, ona əməl edilməlidir. Bu,
nədən ibarətdir? Bakı şəhərində 0,3 əmsal deyilən anlayış var. Burada
tikintinin hündürlük məsafəsi, yəni, 0 səviyyəsindən dam örtüyünə qədər
olan məsafədən söhbət gedir. Yəni, deyək ki, evin hündürlüyü 4
metrdirsə, bu 0,3-ə vurulur. Alınan nəticə nəzərə alınmaqla, qonşu
həyətlər və əsas yolla məsafə gözləyərək tikinti aparıla bilər".
R Osmanlının sözlərinə görə, ilk növbədə tikinti aparılacaq ərazinin torpaq sahəsinin çıxarışının olması vacibdir:
"Eyni
zamanda, çıxarışda mütləq şəkildə həmin torpağın yaşayış məntəqəsi
torpağı olması şərtdir. Nazirlər Kabinetinin 2014-cü ildə qəbul olunmuş
qərarı var. Bu, 100 kvadrat metr torpaq sahəsində inşa oluna biləcək
maksimal yaşayış sahəsinin ölçüsünü müəyyən edir. Həmin qərara görə, 100
kvadrat metr torpaq sahəsində maksimum 20 kvadrat metr yaşayış sahəsi
inşa etmək lazımdır. Bundan sonra vətəndaş bu fəaliyyət növü ilə məşğul
olan lisenziyalaşdırılmış şirkətə müraciət edir. Həmin şirkətdə memarlıq
planlaşma layihəsi çəkilir. Layihə çəkildikdən sonra ərazi üzrə rayon
icra hakimiyyətinə müraciət edilir. 15 gün ərzində rayon icra
hakimiyyəti həmin layihənin tikinti qaydalarına uyğun olub-olmadığlnı
yoxlayır və rəy verir. Əgər qeyd olunan normativlər pozulmayıbsa, icra
hakimiyyəti razılıq verir və tikinti işləri başlayır. Əgər 15 iş günü
ərzində məktub daxil olduqdan sonra rayon icra hakimiyyəti cavab
vermirsə, layihə razılaşdırılmış hesab olunur".
Xəbərdən istifadə edərkən istinad etmək vacibdir.
