Əziz Əliyev adına Sumqayıt Tibb Kolleci tərəfindən keçirilən
tender müsabiqəsinin (kotirovka sorğusu) qalibi "Aktiv-N Ticaret” MMC
olub.
"Aktiv-N Ticaret” MMC Sumqayıt Tibb Kollecinin sifarişilə bu quruma avadanlıqlar satacaq.
Sumqayıt Tibb Kolleci "Aktiv-N Ticaret” MMC-yə 9 min 950 manat ödəyəcək.
Məlumat üçün bildirək ki, "Aktiv-N Ticaret” MMC – 17.08.2020-ci il
tarixində dövlət qeydiyyatına alınıb. Sumqayıt Tibb Kolleci müsabiqə
elanını 21.10.2020-ci il tarixində elan olunub.
Bu isə o deməkdir ki, tender müabiqəsinin qalibi olan MMC tender elanının verilməsindən cəmi 2 ay əvvəl yaranıb.
Nizamnamə kapitalı 5 manat olan "Aktiv-N Ticaret” MMC-nin hüquqi ünvanı
Nərimanov rayonu, Əliyar Əliyev, ev 9A, m. 105-də yerləşir. Qanuni
təmsilçisi Əhmədzadə Miralim Nizami oğludur.
Qeyd edək ki, "Aktiv-N Ticaret” MMC qeydiyyatdan keçdikdən ay yarım
sonra daha 2 tenderin qalibi olub. Oktyabr ayında Sumqayıt Tibb
Kollecinin 19 min 995 manatlıq, Gəncə Turizm İnformasiya Mərkəzinin isə
33 min 900 manatlıq tenderinin qalibi olub.
Məlumat üçün onu da bildirək ki, yeni yaranan şirkətlərin Sumqayıt Tibb
Kollecinin keçirtdiyi tenderlərdə qalib olması halı daha əvvəl də qeydə
alınıb. Belə ki, bu ilin avqust ayının 6-da Əziz Əliyev adına Sumqayıt
Tibb Kolleci tərəfindən tender müsabiqəsi elan olunub. Tender
müsabiqəsinin qalibi 10 gün əvvəl - 27.07.2020-ci il tarixində dövlət
qeydiyyatına alınan "ZZ-Ticaret” MMC olub. Sumqayıt Tibb Kolleci
"ZZ-Ticaret” MMC-yə 9 min 840 manat ödəyib.
Xatırladaq ki, "Dövlət satınalmaları haqqında" Qanunun 6-cı maddəsində
malgöndərənlərin (podratçıların) ixtisasına dair tələblər yer alıb.
Həmin maddənin 6.2.1-ci bəndində açıq şəkildə yazılır ki, satınalma
müqaviləsinin icrasını təmin etmək üçün müvafiq sahədə peşəkarlığının,
təcrübəsinin, texniki və maliyyə imkanlarının, işçi qüvvəsinin,
idarəetmə səriştəsinin, etibarlığının olması lazımdır. Tender
müsabiqəsindən cəmi 1-2 ay əvvəl yaranan bu şirkətlərin hansı
peşəkarlığa və təcrübəyə sahib olacağı da aydın deyil.
Sumqayıt Tibb Kolleci 1969-cu ildən fəaliyyətə başlayıb. 2010-cu ildən
Ə.Əliyev adına Sumqayıt Tibb Kolleci adlandırılıb. Kollecin direktoru
tibb elmləri doktoru Rəfayıl Eyvazovdur.(yeniavaz.com)
Xəbərdən istifadə edərkən istinad etmək vacibdir.
