Sumqayıt Bələdiyyəsi üçün "İnformasiya əldə etmək” haqqında Qanun, belə görünür ki, ləğv edilib. 6 ay öncə göndərdiyimiz İnformasiya Sorğusuna hələ də cavab verilməməsini başqa cür şərh etmək çətindir.
Məlumat üçün bildirək ki, qanun informasiya sorğusuna 7 iş günü ərzində cavab verilməsini tələb edir. (http://www.e-qanun.az/framework/11142)
Bələdiyyənin indiki sədr əvəzi Sərviz Süleymanovun Sultan Əsədovu devirdikdən sonra başladığı "islahatlar”ın siyahısında mətbuat xidmətinin ləğv olunmasının da yer alması ilə təsdiq etdi ki, yeni rəhbər üçün ictimaiyyəti məlumatlandırmaq, sorğulara cavab vermək prioritet olmayacaq. Qurumun saytının sonuncu dəfə fevral ayında yenilənməsi də bunu təsdiq edir.
Mart ayında Bələdiyyəyə ünvanladığımız suallar artıq aktuallığını itirsə də, hər halda, onları yenidən təkrar edirik:
1. Nə qədər məhəllə komitəsinin ləğvi barədə qərar qəbul edilib və bu qərar hansı zərurətdən irəli gəlib?
2. Bələdiyyənin özünü maliyyələşdirmə siyasətində hansı dəyişikliklər olacaq?
3. Qurumun sosial müəssisələrinin yaradılması nəzərdə tutulurmu?
Turqut Rzalı
Xeberle.com
Xəbərdən istifadə edərkən istinad etmək vacibdir.
