Azərbaycana yaz fəslinin girməsinə baxmayaraq ölkədə qış havası müşahidə edilir. Belə ki, martın 29-dan havanın kəskin şəkildə dəyişməsindən sonra Azərbaycanın bir sıra bölgəsinə qar yağıb.

Daşkəsən rayonuna güclü qar yağmağa başlayıb. Hazırda rayon mərkəzində qarın qalınlığı 10sm, nisbətən yüksək ərazilərdə isə 15-20 santimetrə çatıb.

Digər dağ rayonu olan Gədəbəydə də qarlı-şaxtalı hava müşahidə olunur. Hazırda rayon mərkəzində qarın qalınlığı 5 santimetrə çatıb. 

Quba rayonuna da qar yağıb.Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosu isə bildirib ki, bəzi bölgələrdə yağışın sulu qara keçməsi müşahidə edilir.  

Bakıda da hava soyuq olmaqla yanaşı yağış da yağır.  

Sabah Azərbaycanın rayonlarında hava şəraitinin arabir yağıntılı olacağı, dağlıq və dağətəyi rayonlarda sulu qar, qar yağacağı gözlənilir. Gündüz yağıntının bəzi yerlərdə kəsiləcəyi ehtimalı var. Ayrı-ayrı yerlərdə duman olacaq. Arabir güclənən şərq küləyi əsəcək.

Havanın temperaturu Aran rayonlarında gecə 0-5, gündüz 7-12 dərəcə isti, dağlarda 1-6 şaxta, gündüz 0-5 dərəcə isti olacaq.