Gülnarə Əkbərzadə 8 il ərzində hüquq-mühafizə orqanlarından gizlənməyə nail olub. 

Bakı Ağır Cinayətlər Məhkəməsində azərbaycanlı qadınları Dubayda fahişəliyə cəlb etməkdə təqsirləndirilən 1961-ci il təvəllüdlü Gülnarə Musa qızı Əkbərzadənin cinayət işi üzrə məhkəmə prosesi yekunlaşıb.

Məlumata görə, hakim Rauf Əliyevin sədrliyi ilə keçirilən prosesdə hökm oxunub. Hakimlər kollegiyasının hökmünə əsasən Gülnarə Əkbərzadə 3 il sınaq müddəti olmaqla şərti cəza alıb. G. Əkbərzadə məhkəmə zalından azadlığa buraxılıb.

Qeyd edək ki,  G.Əkbərzadə 8 il ərzində hüquq-mühafizə orqanlarından gizlənməyə nail olub. Buna görə də o, İnterpol xətti ilə axtarışa verilib.

G.Əkbərzadə bu il  Dubayda həbs edilib.

G.Əkbərzadənin cinsi istismara məruz qoyduğu Azərbaycan vətəndaşlarının indiyədək 15 nəfərinin adını müəyyən edilib. G.Əkbərzadə həmin qadınları Dubayda ayrı-ayrı otellərdə və şəxsi evlərdə satmaqla məşğul olub.

O da məlum olub ki, mütəşəkkil cinayətkar dəstənin rəhbərliyi Azərbaycandan əsasən 20-28 yaş arasında olan gənc qızları apararaq ərəblərə satırmış.(Lent.az)