Bakı Ağır Cinayətlər Məhkəməsində qeyri-rəsmi şəkildə birlikdə yaşadığı hamilə qadını öldürməyə cəhd göstərən 1984-cü il təvəllüdlü Məhəmməd Əliyevin cinayət işi üzrə məhkəmə prosesi başa çatıb.

Hakim Səbuhi Hüseynovun sədrliyi ilə keçirilən prosesdə hökm oxunub. Hökmə əsasən, M.Əliyev 14 il müddətinə azadlıqdan məhrum edilib.

Məhkəmə istintaqı zamanı təqsirləndirilən şəxs ifadəsində qeyri-rəsmi nikahda olduğu Ayşən Gülüşovanı qorxutmaq niyyətinin olduğunu bildirib: "Məqsədim yalnız və yalnız barışmaq olub. Bir neçə aydır ki, ayrılmışdıq. Bacısıgildə qalırdı. Barışmağa getmişdim. Özüm də bilmədim hadisə necə oldu. Evə girdim, nə qədər yalvarsam da, mənimlə barışmayacağını bildirdi. Həmin vaxt özümdən çıxdım. Bıçağı çıxartdım və bir də ayıldım ki,  Ayşən yerdədir. Qorxdum, həyəcan basdı. Oradan qaçdım. Peşmanam. Bu cür olmasını istəməzdim. Hamilə olduğunu bilirdim”.

Zərərçəkən Ayşən Gülüşova ifadə verib. O, ifadəsində təqsirləndirilən şəxsdən heç bir şikayətinin olmadığını, onu bağışladığını bildirib: "Biz onunla ayrılmışdıq.  Bacımoğlu məktəbdən gəlmişdi. Ona yemək hazırlayırdım. Qaz birdən-birə kəsildi. Qapıdan çölə çıxdım ki, bəlkə ümumi xətdən kəsilib. Bu zaman Məhəmməd orda idi. Qapını örtmək istədim. İçəri girdi. Mənimlə barışmaq istədiyini bildirdi. Rədd etdim və dedim ki, istəmirəm, sən yoluna, mən yoluma. Qəzəbləndi, özündən çıxdı. Cibindən bıçağı çıxartdı. Üstümə cumdu. Bıçaqla boğazıma, bədənimə zərbələr endirdi. Yerə yıxıldım. Bu zaman sanki özünə gəldi. Əl çəkdi, qaçıb getdi. Hadisələr bacımın 12 yaşlı oğlunun gözünün qabağında baş verdi. Mənimlə barışmaq niyyəti vardı. Mən istəmədim. Şikayətim yoxdur”.

Dövlət ittihamçısı Ayşən Gülüşovanın istintaq verdiyi ifadələrlə məhkəmədə verdiyi ifadələrin ziddiyət təşkil etdiyini bildirib: "O, istintaq zamanı deyib ki, Məhəmməd onu yerə yıxıb, boğazını üzmək istəyirdi, özünü ölülüyə vurub, Məhəmməd də öldüyünü zənn edib çıxıb gedib”.

Zərərçəkmiş şəxs istintaq zamanı hamilə olduğunu və həyəcanlı olduğundan bu cür ifadə verdiyini bildirib: "Hamiləydim, həyəcanlıydım, hadisənin şoku üzərimdəydi. Bilmirdim nə deyirdim”.

Ayşən Gülüşova övladlarının dünyaya gəldiyini bildirib: "Barışmışıq, övladım olub”.

Qeyd edək ki, hadisə bu il aprel ayında Suraxanı rayonu Tağıyev küçəsində qeydə alınıb. 31 yaşlı Məhəmməd Əliyev qeyri-rəsmi birlikdə yaşadığı  23 yaşlı Ayşən Gülüşova ilə mübahisə edib. Ailə daxili mübahisə o həddə çatıb ki, kişi həyat yoldaşına baş nahiyəsindən bıçaqla xəsarət yetirib. Həyat yoldaşını al-qan içində görən Məhəmməd Əliyev daha sonra əlindəki bıçaqla özünə xəsarət endirib.  Səs-küyə gələn qonşular hər iki yaralını 3 saylı şəhər xəstəxanasına çatdırıblar.

Məhəmməd Əliyev Cinayət Məcəlləsinin 29.120 (öldürməyə cəhd) maddəsi ilə ittiham olunur.(lent.az)