Sumqayıt polisi Corat və Novxanı qəsəbələrinin ərazisində telefon və internet kabellərinə qənim kəsilmiş şəxsi ifşa edib. 
Kəpəz TV (Region TV) xəbər verir ki, bu ilin fevral ayının əvvəlindən Corat və Novxanı qəsəbələrinin ərazisindən telefon və internet kabellərinin oğurlanması ilə bağlı Sumqayıt Şəhər Polis İdarəsinə vətəndaşların müraciətləri daxil olub. Həyata keçirilən əməliyyat- axtarış tədbirləri nəticəsində oğurluq hadisələrinin Corat qəsəbə sakini 44 yaşlı İlham Atayev tərəfindən törədilməsi müəyyən olunub. Saxlanılaraq idarəyə gətirilən Atayev istintaqa ifadəsində törətdiyi cinayət əməllərini etiraf edib. 
Əvvəllər 2 dəfə məhkumluq həyatı yaşayan İlham Atayev oğurluğu narkotikə olan tələbatını ödəmək üçün etdiyini söyləyib.
Saxlanılan şəxs telefon və internet kabellərini kəsib oğurlamaqla dövlətə 3 min manatdan artıq maddi ziyan vurub. Faktla bağlı Sumqayıt Şəhər Polis İdarəsində başlanan cinayət işi üzrə araşdırmalar davam edir.