Sumqayıt Apellyasiya Məhkəməsində qohumunu bıçaqlamaqda təqsirləndirilən Qasım Əsədovun birinci instansiya məhkəməsinin hökmündən verdiyi şikayət üzrə məhkəmə prosesi başa çatıb.
Lent.az-ın məlumatına görə, hakim Vidadi Cəfərovun sədrliyi ilə keçirilən prosesdə qərar elan olunub. Hakimlər kollegiyasının qərarına əsasən, Q.Əsədovun 8 il müddətinə azadlıqdan məhrumetmə cəzası 3 il azaldılaraq, 5 ilə salınıb.
Qeyd edək ki, hadisə keçən il baş verib. Q.Əsədov qohumu Əli Şıxəliyevi bıçaqlayıb. Xəstəxanaya çatdırılan yaralının həyatını xilas etmək mümkün olub. Q.Əsədov polis əməkdaşları tərəfindən saxlanılıb. İlkin istintaq zamanı məlum olub ki, Q.Əsədov içkili vəziyyətdə qohumuna bıçaq zərbəsi endirib. Ə.Şıxəliyev məhkəməyə ifadə verərkən şikayətçi olmadığını bildirib. Bakı Ağır Cinayətlər Məhkəmənin hökmü ilə Q.Əsədov 8 il müddətinə azadlıqdan məhrum edilib.