ABŞ mətbuatı Camal Qaşıqçının öldürülməsi üçün İstanbula gəldiyi iddia olunan şəxslər barədə məlumatlar dərc edib.
Xeberle.com xəbər verir ki, 15 nəfərlik sui-qəsd dəstəsinin üzvlərinin əksər hissəsinin Səudiyyə Ərəbistanı vəliəhdi Məhəmməd bin Salmanla əlaqələri olduğu üzə çıxıb.
Camal Qaşıqçının məqalələrlə çıxış etdiyi "Vaşinqton Post” nəşri dəstənin 7 üzvünün şəxsiyyət vəsiqələrini paylaşıb. Bu şəxslərin əsl kimliyinin təsdiqlənməli olduğunu yazan nəşr, şəxsiyyət vəsiqələrində adları və şəkilləri gizlədib.
"Nyu York Tayms” isə dəstənin 5 üzvü barədə ətraflı məlumat yayıb:
1. Maher Əbdüləziz Mutreb – 2017-ci ildə Səudiyyə Ərəbistanının London səfirliyinə təyinat almış diplomat, vəliəhdlə cangüdən qismində bir sıra səfərlərdə iştirak edib.
2. Məhəmməd əl-Həvsəvi - şahzadə Məhəmmədlə səyahət edən təhlükəsizlik dəstəsinin üzvü.
3. Thaar Qalib əl-Hərbi – ötən il Səudiyyə Krallıq Keşikçiləri cərgəsində olarkən vəliəhd Məhəmmədin Ciddədəki sarayının mühafizəsində göstərdiyi cəsarətə görə leytenant rütbəsi verilib.
4. Məhəmməd Saad Əlzəhrani – başqa birinin sənədi ilə səyahət edən bu şəxs də Krallıq keşikçilərindən hesab olunur.
5. Həkim Salah əl-Tubayiqi – autopsiya (meyityarma) mütəxəssisidir.
Qeyd edək ki, Camal Qaşıqçı oktyabrın 2-də İstanbuldakı Səudiyyə Ərəbistanı Baş Konsulluğuna daxil olduqdan sonra yoxa çıxıb.
Xəbərdən istifadə edərkən istinad etmək vacibdir.
