Etdiyi cinayətə görə həbsxanada cəza çəkən rus qadın İslamı qəbul edib.
Xeberle.com Moderator.az-a istinadən xəbər verir ki, bu haqda "Çeçenistan bu gün” qəzeti yazıb. Söhbət Çeçenistanın Arqun şəhərindəki 3 saylı islah əmək müəssisəsində cəza çəkən Snejana Suxanovadan gedir. Qadının sözlərinə görə, o çoxdan müsəlman olmaq haqda düşünüb, lakin qəti qərara gələ bilməyib. Son vaxtlar həyatında nəyinsə çatışmadığını duyduğundan mənəvi axtarış halında olub. Zindanda müsəlman qadınlarla tanışlıq onun İslamı qəbul etmək arzusunu möhkəmlədib. Bir müddət etdiyi günah və xətalara görə tövbə etdikdən sonra rus qadın həyatına təmiz səhifədən başlamaq qərarına gəlib.
Cəzaların İcrası üzrə Federal Xidmət İdarəsinin Çeçenistan şöbəsi rəisinin inanclılarla iş üzrə köməkçisi Ramzan Zubariyev Snejana Suxanovanı dinlədikdən sonra müvafiq müsəlman ayinini icra etdirib. Yəni rus qadın kəlmeyi-şəhadət gətirərək "Allahdan başqa Allah yoxdur və Məhəmməd onun rəsuludur” söyləyib. Bundan sonra ona İman adı verilib və müsəlmanın vacib vəzifə və əməlləri çatdırılıb. Ayinin sonunda R.Zubariyev müsəlman rus xanıma Allahdan bağışlanma diləyib və həyatında uğurlar arzulayıb.
Rus qadının məhz hansı cinayətə görə həbsdə olduğu barədə məlumat verilmir.
Xəbərdən istifadə edərkən istinad etmək vacibdir.
