Xəzərin sahilində yerləşən Sumqayıt ən gənc və müasir şəhərdir.
Sumqayıt şəhəri sahilboyu yerləşdiyi üçün şəhərin istənilən yerindən maksimum 30 dəqiqə müddətində piyada gedərək Xəzərin sahilinə çata bilərsiniz. Sahildə yeni salınmış Sumqayıt bulvarı Bakıdakı bulvardan heç də geri qalmır.
Sumqayıtda azmaq ehtimalınız demək olar ki yoxdur. Şəhərdə piyada gəzməkdən yorulsanız, 7 nömrəli marşrut ilə şəhərin istənilən hissəsinə gedə bilərsiniz. Tək 7 nömrə yox, şəhərdə ictimai nəqliyyat kifayət qədər əlçatandır. Həm də Sumqayıtda ictimai nəqliyyatda basabas, yollarda isə tıxac olmur.
Sumqayıtda taksi xidməti də çox sərfəlidir.
Demək olar ki, Sumqayıtın istənilən yerindən istənilən yerinə taksi 3 manata aparır. Qonşuluqdakı Xırdalana və Bakıya gedib-gəlmək üçün isə ən rahat ictimai nəqliyyat müasir Bakı-Sumqayıt qatarıdır.
Sumqayıtda ev almaq və ya kirayə qalmaq Bakı şəhərindən 2-3 dəfə ucuz başa gəlir.
Həmçinin bazar qiymətləri də, çayxana, restoran, bərbər, dərzi, çəkməçi və digər xidmətlər də Bakıdan çox ucuzdur.
Bakı ilə müqayisədə Sumqayıtda pul azdır, ona görə şişirtmə süni həyatlar da, demək olar ki, yoxdur.
Sumqayıtda övladlarınızın təhsili üçün də gözəl imkanlar var. Sumqayıtın harasında yaşasanız oraya yaxın azı bir məktəb mütləq vardır.
Sumqayıt, heç kimin yerli olmadığı, hamının əslində Azərbaycanın, keçmiş SSRİ-nin hər yerindən bura gəldiyi, qurub yaşadığı bir şəhərdir. Çünki Sumqayıt sülh şəhəridir. Bu şəhəri müxtəlif mədəniyyətlərdən, millətlərdən olan insanlar qurublar, tikiblər.
İndi də Sumqayıt Azərbaycanın ən qabaqcıl insanlarını yetişdirməkdədir. Və bu şəhər günü-gündən sürətlə böyüyür, gözəlləşir.
Bu şəhərdə sevgi və güvən var.
Xəbərdən istifadə edərkən istinad etmək vacibdir.
