Sumqayıtda 22 aprel Beynəlxaq Yer günü ilə əlaqədar olaraq maraqlı təşəbbüs baş tutub.
Belə ki, Sumqayıt şəhər Təhsil Şöbəsinin nəzdində fəaliyyət göstərən Gənc Müəllimlər Şurası Yer Gününün 50-ci ildönümü münasibətilə hazırkı həssas dönəmdə hər kəsi dünyaya olan sevgi və qayğısını daha qabarıq, kreativ formada təqdim etməyə çağırır.
"Gəlin evdə qalaraq pəncərələrimizdə evimiz olan dünyaya, onun hər bir ünsürünə olan diqqətimizi, sevgimizi rəsmlərlə ifadə edək. Bütün Azərbaycan məktəblilərinin kollektivlərinə müraciət edirik: Siz də təhsil ailəsi olaraq bizə qoşularaq rəngarəng şəkillərlə pəncərəmizdən dünyaya sevgi dolu mesajları birlikdə göndərək.”
Qeyd edək ki, artıq Sumqayıtın bir sıra məktəbləri artıq bu çağırışa qoşulub. Belə ki, evdə qalan şagirdlər pəncərələrə rəngarəng rəsmlər çəkiblər. Bu şəkillər sosial şəbəkələrdə də böyük maraqla qarşılanıb.
Xatırladaq ki, aprelin 22-si BMT-in himayəsi ilə hamımızın doğma evi – Beynəlxalq Ana Yer Kürəsi Günü (International Mother Earth Day) qeyd edilir. Bu bayram 2009-cu ilin bu günündə BMT-in Baş Assambleyasının 63-cü sessiyasında təsis edilmiş və 2010-cu ildən başlayaraq hər il 22 apreldə keçirilir. Şimal yarımkürədə Yer günü yazda, Cənub yarımkürədə isə payızda qeyd olunur. Bu ümumdünya aksiyasının əsas məqsədi cəmiyyətin və hər bir insanın Yer kürəsinin, onun ətraf mühitinin problemlərinə diqqəti cəlb etməkdir.
Xəbərdən istifadə edərkən istinad etmək vacibdir.
