Dövlətimizin təhsil sahəsində göstərdiyi diqqət və qayğının nəticəsidir ki, ölkəmizdə ümumtəhsil məktəblərinin maddi-texniki bazası möhkəmləndirilir, müasir tələblərə cavab verən yeni təhsil ocaqları tikilib istifadəyə verilir, müəllim və şagirdlərə göstərilən qayğı gündən-günə daha da artır. Son illərdə Sumqayıtda məktəblərin yenidən inşası bunun bariz nümunəsidir.
Xeberle.com-un əməkdaşı şəhəri Sumqayıtda İ.Qayıbov adına 1 nömrəli tam orta məktəbin müəllimi Afaq Cəbrayılova ilə hömsöhbət olub.
- Əvvəlcə sizi tanıyaq...
1984-cü ildə Sumqayıt şəhərində doğulmuşam. 2002-2006-cı illərdə SDU-nun kimyaçı, kimya müəllimi fakültəsində təhsil almışam. 2006-cı ildə ETN-nin İnkişaf proqramı üzrə Salyan rayonunun Birinci Varlı kəndində, 2007-2011-ci illərdə Sumqayıt şəhəri 40 nömrəli məktəbdə kimya müəllimi kimi işləmişəm. 2011-ci ildən indiyə kimi Sumqayıt şəhəri İ.Qayıbov adına 1 nömrəli tam orta məktəbdə fəaliyyətimi davam etdirirəm.
-Yaxşı müəllim olmaq üçün nə etmək lazımdır?
Müəllim peşəsi çox çətin peşədir. Yaxşı müəllim olmaq üçün gərək öz üzərində daima çalışasan. Daima oxuyasan, çünki elm inkişaf edir, tələblər dəyişir. Müəllim gün ərzində nə qədər uşaqla təmasda olur. İndiki uşaqlar və onların sualları o qədər fərqli və maraqlıdır ki, yaxşı müəllim olmaq üçün öyrədərkən öyrənməlisən. Gizlətmirəm, bu illər ərzində mən şagirdlərimdən də çox şey öyrənmişəm. Bir də mütləq sevilən müəllim olmaq üçün şagirdə sevgi verməlisən.
-Dərsdən əlavə repitoturluqla məşğul olursunuz?
Bəli. Həm repetitorluq edirəm, həm də tədris mərkəzində fəaliyyət göstərirəm. Artıq 4-cü ildir ki, hazırladığım şagirdlərin hamısı universitetlərə qəbul olur. 100% nəticə ilə ili başa vurmaq çox sevindiricidir.
-Azərbaycanda təhsil sahəsində olan problemlər uzun illərdir ki, müzakirə olunmaqdadır. Bir sıra dəyişikliklər baş versə də, bunların əsas etibarilə kosmetik dəyişikliklər olduğu zamanla vurğulanır. Niyə hələ də problemlərin tam həllinə nail olunmur?
Ən əsas problemimiz tədris proqramının ağırlığıdır. Dərsliklərin çox çətin qavranası tərzdə yazılmasıdır. Kimyadan dərs saatının azlığı da bu çətin fənn üzrə məzmun standartlarının mənimsənilməsinə təsir göstərir. Amma, hazırda müəyyən islahatlar aparılır. Keçən tədris ilində pilot layihəyə qoşuldum. Pilot layihəyə əsasən, artıq 7-ci sinifdə kimyadan tədris proqramı yüngülləşdirilib. 7-ci sinif dərsliyi yenilənərək, sırf Sinqapur təhsil sisteminə uyğun olaraq daha anlaşılan və yüngül tərzdə yazılıb. Ümid edirəm ki, aparılan islahatlar nəticəsində şagirdlər yüklü proqramdan azad olaraq psixoloji yüklənməyəcək, müəllimlərin də yazı-pozu işi ilə bağlı işləri yüngülləşdiriləcək.
-Sumqayıt təhsil sistemi ilə bağlı fikirlərinizi bilmək istərdik.
Sumqayıt təhsili hər zaman öndədir. Həm ali məktəblərə qəbulda, həm olimpiadalarda şagirdlərimizin qalibiyyəti Sumqayıt təhsilini hər zaman öndə edir. Əlbəttə ki, bu işdə böyük rolu müəllimlərimiz oynayır. Bu da onu göstərir ki, Sumqayıt təhsili düzgün qurulub. Elə buna görə də nailiyyətlərimiz, uğurlarımız hər zaman bizi respublikada öndə edəcək.
-Bəzi müəllimlər sertifikasiyaya ehtiyac olmadığını bildirirlər. Sosial şəbəkələrdə bəzən belə fikirlər də yer alır ki, imtahan nəyə lazımdır? Ümumiyyətlə, siz necə dəyərlərirsiniz?
Sertifikasiya məcbur edir ki, hər bir müəllim öz üzərində işləsin, yenilikləri öyrənsin. Çünki, biz müəllimlər "Z” nəsli ilə işləyirik.
-Tədrisdə hansı yeniliklərdən istifadə edirsiniz?
Elm və texnologiya inkişaf etdikcə tədrisdə yeniliklər, yeni metodlar da artmaqdadır. Dediyim kimi biz "Z” nəsli ilə işləyirik. Ənənəvi metodlarla bu nəslə mövzunu mənimsətmək qaneedici olmaz. Mən də maksimum yeni metodlardan, eksperimentlərdən istifadə edirəm. Araşdırmanı təşviq etmək, tənqidi düşünmə bacarıqlarını, özünü qiymətləndirməni təkminləşdirmə, problemin yaradıcı həlli ən vacibdir. Bütün bunları tətbiq etməklə şagirdin bilik və bacarığı inkişaf edir və sanki puzzle kimi hər şey öz yerini tutur.
-Şagirdlərinizlə münasibətləriniz necədir?
Şagirdlərimlə münasibətim yaxşıdır. Səmimi münasibəti qorumağa hər zaman çalışıram. Sevilən müəllim olmaq üçün əlimdən gələni edirəm. Çünki, şagirdlərim fənnimdən əvvəl məni sevməlidirlər.
-Sumqayıtda hansı yenilikləri görmək istərdiniz?
Sumqayıt hər zaman inkişafdadır. Hər zaman yenilənir və hər sahədə irəliləyir. Çox istərdim ki, gənclərin, uşaqların asudə vaxtlarını səmərəli keçirtməkçün yerlər təşkil olunsun. Sahibsiz heyvanlar üçün sığınacaqlar açılsın.
-Bu il şəhərimizin 75 illiyi qeyd olunacaq. Fəaliyyət göstərdiyiniz məktəbdə hansı hazırlıq işləri görülür?
Müxtəlif fənn gecələri,breyn-rinqlər təşkil olunacaq. İstedadlı şagirdlərimizlə birgə tədbirlər hazırlanacaq. Sumqayıtı hər birimiz çox sevirik. Hara getsək belə Sumqayıt bizim üçün doğma və əzizdir.
-Bizə vaxtınızı ayırdığınız üçün təşəkkür edirik.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
