Sumqayıt şəhər H.Aslanov adına 22 nömrəli tam orta məktəbdə 8 Noyabr – Zəfər Gününə həsr olunmuş tədbir keçirilib.
Tədbirdə məktəbin pedaqoji kollektivi ilə yanaşı, şəhid anaları, qazilər və şagirdlər iştirak ediblər. Əvvəlcə Vətən uğrunda canını fəda etmiş şəhidlərin xatirəsi bir dəqiqəlik sükutla yad edilib və Dövlət Himni səsləndirilib.
Tədbiri giriş sözü ilə məktəbin direktoru Tahirə Səfərova açaraq, Azərbaycanın ərazi bütövlüyü uğrunda döyüşən igid oğul və qızların şücaətindən, xalqımızın tarixi Zəfərindən söz açıb. O bildirib ki, 44 günlük Vətən müharibəsində əldə olunan qələbə Azərbaycan xalqının birliyi, ordumuzun gücü və Ali Baş Komandanın qətiyyətli rəhbərliyi sayəsində mümkün olub.
Daha sonra çıxış edən şəhid anaları və qazilər müharibə illərində yaşanan qəhrəmanlıq nümunələrindən danışıblar, gənc nəslə Vətənə sevgi və sadiqlik hisslərini qoruyub saxlamağı tövsiyə ediblər.
Tədbir məktəblilərin ifasında vətənpərvərlik ruhunda şeirlər, mahnılar və səhnəciklərlə davam edib.
Sonda qonaqlara təşəkkür edilib və Zəfər Gününün xalqımız üçün əziz və qürurverici bir tarix olduğu vurğulanıb.
Xəbərdən istifadə edərkən istinad etmək vacibdir.
