Ramin keyfiyyətli təhsil almaq istəyir. Deyir ki, böyüyəndə tanınmış hüquqşünas olacaq. Amma onun bu arzusunu əngəlləyən bir məqam var. Söhbət məktəblərdəki sinif otaqlarındakı şagird sıxlığından gedir.
Qəhrəmanımız Nəsrəddin Tusi adına Təbiət və Texniki təmayüllü məktəb-liseyin 8-ci sinif şagirdidir. Onun oxuduğu sinifdə şagirdlərin normadan çox olması onun bəzi fənləri mükəməl qavramasını əngəlləyir. Elə məktəbin direktoru da faktı təsdiqləyir.
Valeh Məmmədov deyir ki, 1170 yerlik məktəbdə 1350 şagird 63 sinif otağında təhsil alır. Bu da orta hesabla hər sinifə 24-26 məktəblinin düşməsi deməkdir.
Şagirdlərin sayının normadan çox olması dərsin qavranılmasında problemlər yaradır ki, bu da aşağı sinif şagirdlərinin repetitor yanına ayaq açmasına gətirib çıxarır. Elə Fatimə kimi. O, sinifdəki 28 şagirddən biridir. Şikayəti sinif yoldaşlarından yox, sinifdəki şagird sıxlığındandır.
Bütün şagirdlərə vaxt ayırmaq, görüləsi işləri çatdırmaq müəllimdən əlavə bir bacarıq tələb edir. Nəzərə almaq lazımdır ki, nə müəllim, nə də şagird robot deyil. Birincilərlə qısa müddətdə daha yaxşı formada məşğul olmaq, onları öyrətmək də mümkünsüzdür.
Məsələnin həllinə gəldikdə isə Təhsil Nazirliyinin şöbə müdiri Aydın Əhmədovun sözlərinə görə, şagirdlərin sayı minimum 30-dan çoxdursa, iki sinifə bölünə bilər. Ancaq bunu problem olan məktəblərdə asanlıqla tətbiq etmək mümkün deyil.
Analoji hal Sumqayıtda da yaşanır. Şəhərin əksər orta məktəblərində hər sinif otağında təxminən 40-42 şagird təhsil alır. Bu isə müəllimin keyfiyyətli dərs keçməsinə mane olmaqla yanaşı, həm də uşaqların səhhəti üçün təhlükədir.
Rəşad Həsənov deyir ki, məktəbdə hər bir uşağa 2-2,5 kvadratmetr sahə düşməlidir. Otağın hündürlüyü isə 3 metr olmalıdır. Sumqayıt şəhər Təhsil Şöbəsinin müdir müavini Firudin Həmzəyev problemin ciddiliyindən xəbərdar olduqlarını, günahı isə valideynlərdə gördüyünü dedi.
Bu il Gəncə şəhərində fəaliyyət göstərən orta məktələrdə isə sıxlıq olmayacaq. Hər halda Gəncə şəhər Təhsil İdarəsindən belə deyirlər. Bildirilib ki, şəhər məktəblərində hər sinifə 22 şagird düşür ki, bu da ən yaxşı göstəricilərdəndir. Ümumilikdə Gəncədə 38 min 646 şagird təhsil alır. Bu isə ötən ilə nisbətən 1000 nəfər çoxdur. Məktəbilərin təlim-tərbiyəsi ilə 3 min 986 müəllim məşğul olur.
Ekspertlərin fikrincə, əgər uşaq məktəbin yerləşdiyi ərazidə yaşamırsa şagird qəbulu zamanı üstünlük ərazidə yaşayan sakinlərə verilməlidir. Belə olan təqdirdə uşaqlarımız da sağlam mühitdə təhsil alar, tədrisin isə keyfiyyəti artar.
Xəbərdən istifadə edərkən istinad etmək vacibdir.
