"Müəllimi heç nə eləyiblər, bir şey olan kimi çəkib internetdə yerləşdirirlər”

Müəllimlik elə bir peşədir ki, ondan  nə qədər yazsaq da, azdır. Çünki cəmiyyətdə şəxsiyyət kimi formalaşmağımızda müəllimlərin böyük və əvəzedilməz rolu var. Elə  ömrünün böyük bir qismini bu şərəfli peşəyə, şagirdlərinə həsr edən Vahid müəllim kimi. Xeberle.com olaraq bu qocaman müəllimlə maraqlı söhbət etdik. Beləliklə, budəfəki həmsöhbətimiz  Qubadlı rayon Yuxarı Mollu kənd orta məktəbinin müəllimi Vahid Quliyevdir.

 

HAŞİYƏ: Quliyev Vahid Heydər oğlu 1952-ci ildə Qubadlı rayonunun Yuxarı Mollu kəndində anadan olub. O, hələ 15 yaşında ikən Yuxarı Mollu kənd orta məktəbini əla qiymətlərlə  bitirib. Azərbaycan Dövlət Universitetinin (indiki BDU) Tarix fakültəsini bitirdikdən sonra 1975-ci ilin sentyabr ayının 1-dən anadan olduğu kənddə müəllimlik fəaliyyətinə başlayıb. Həmin ərəfədə məktəbdə tarix müəllimləri çox olduğundan rus dili müəllimi kimi də işləyib. Fasilələrlə 42 ildir ki, müəllim kimi fəaliyyət göstərir.
 
Vahid müəllim, müəllimlik peşəsindən savayı hansısa sahələrdə çalışmısınızmı?
-Bir qədər təvazökarlıqdan uzaq olsa da,deyim ki, hərtərəfli adamam. Bir müddət  Rusiyada mühəndis, Azərbaycanda rayonlararsı tikinti idarəsində müavin, İcra Hakimiyyətinin göndərişi ilə Əhalinin Sosial Müdafiəsi Mərkəzində  və s. kimi işlərdə çalışmışam. Lakin harada işləməyimdən asılı olmayaraq qayıdıb yenidən müəllimlik fəaliyyəti ilə məşğul olmuşam. Müəllimlik ilə daha çox  kişilər məşğul olsa yaxşı olar.  Üzr istəyirəm, amma qadın müəllimlərinin çoxluğu təhsilin səviyyəsini aşağı salır.

 

Bu fikrinizi nə ilə əsaslandırırsınız?
-Çünki şagirdlər onlardan qorxmur, çəkinmirlər. Düzdür, hazırda Vahid müəllimdən də qorxan yoxdur. Səbəb isə müəllimi heç nə eləməkləridir. Bir şey olan kimi çəkib internetdə yerləşdirirlər.

 

Hazırkı təhsil və dərs öyrətmə metodlarında nə kimi əskikliklər görürsünüz?
-Kurikulum bizim cəmiyyətimizə, Azərbaycanın təhsil mühitinə yad bir sistemdir. Mən öz siniflərim arasında da müqayisələr aparıram. Ənənəvi təhsil sistemini bitirən şagirdlər daha yüksək nəticələr göstərirlər. Bu il məktəbimizi 15 şagird bitirib, onlardan 2-si kollecə sənəd verib, 11-i isə ali məktəbə qəbul olub. İndi nə şərait var, nə də ki, güclü müəllimlər. Kitabları da çox qəliz dildə yazırlar.  Təvəzökarlıqdan uzaq olsa da mən  ingilis dilindən başqa, istənilən fənn müəllimi ilə oturub qarşı-qarşıya müzakirə apara bilərəm. Müasir təhsil siteminin ən böyük çatışmazlığı təhsil prosesində kurikulum üsuluna keçilməsidir. Əslində çox gözəl üsuldur, amma Azərbaycan üçün bu üsula keçmək hələ ki, tezdir.

 

 

Sizin fikrinizcə hazırda müəllimə lazımi qiymət verilirmi?
-Bəli, müəllimə qiymət verilir. Gözəl məktəblər tikilir, kitabxanalar yaradılır. Hər şey yaxşıdır, amma bircə onu deyim ki, müəllim üçün vəziyyət çox çətindir. Çünki bir çox müəllimlərimiz var ki, onlar şagirdləri kimi geyinə bilmir. Bəzi şagirdlər çox bahalı paltarlar geyinib dərsə gəlirlər. Belə şagirdin yanında mənim geyimim heç də ürəkaçan görünmür. Yəni müəllimlikdə bu kimi çatışmazlıqlar da olur. Əgər diaqnostik qiymətləndirmədən sonrakı maaşlar qalsaydı, müəllimin vəziyyəti bir qədər yaxşı olardı. Bu il mənim müəllim kimi fəaliyyət göstəməyimin sonuncu ilidir. Təvazökarlıqdan uzaq olsa da, deyim ki, şagirdlərim məni dəhşət çox istəyirlər. Dərs açılandan 2-3 gün sonra hamısı yığışıb gəlirlər yanıma. Bu ən birinci mənim həqiqi müəllim olmağımdan, ikinci isə  gözəl valideyn olmağımdan irəli gəlir. Deməli, şagirdlərimə özümü sevdirə bilmişəm. Onlar məni valideyn, ata, müəllim kimi qəbul ediblər.

 

Zəhmət olmasa, müəllimlik fəaliyyəti müddətində başınıza gələn maraqlı əhvalatlardan birini oxucularımızla bölüşərdiniz…
-70-ci illərin ortaları idi. İki şagirdimin valideynləri xahiş etmişdilər ki, onların uşaqlarını ali məktəbə hazırlaşdırım. Həftədə iki gün təyin etmişdim, onları heç bir təmənna olmadan  həm tarix fənnindən, həm də ki, dil-ədəbiyyatdan hazırlaşdırırdım. Yoldaşlarımla çox güclü voleybol komandası qurmuşduq, dərsdən sonra onlarla oynayır, istirahət edirdik. Abituriyentlər də həmişə oyunun qızğın vaxtında gəlirdilər. Başlayırdım özümü söyməyə (gülür). Daha sonra dedim qızım, gəlməyin. Atası dedi ki, ay Vahid müəllim, biz "erkək” hazırlamışdıq qapınızda kəsməyə. Dedim ay qardaş,  mən pul üçün bu uşaqları hazırlaşdırmıram. Sonralar onların hər ikisi universitetə qəbul oldular. Onlardan biri hər dəfə məni görəndə qucaqlayır, öpür və deyir ki, Vahid müəllim sizə çox minnətdaram ki, mənə inşa yazmağı öyrətdiniz.

 

Təcrübəli müəllim kimi bu ixtisasa yiyələnmək istəyənlərə nə tövsiyə edərdiniz?
-Müəllimlər daim vicdanla hərəkət etsələr, xalqımızın gələcəyi çox gözəl olar. Bir müəllim kimi mən həmişə demişəm və deyəcəm ki, savadlı, ziyalı olun. Ziyalılıq çox böyük məvhumdur. Bir dəfə yol mühəndisinə yolların nəyə görə çökməsi barədə o qədər ətraflı danışdım ki, məndən yol mühəndisi olub-olmadığımı soruşdu. Dedim ki, xeyr, mən müəlliməm. Məəttəl qaldı. Əgər mən ziyalı olaraq jurnalistlə üz-üzə oturub jurnalistikadan, "Əkinçi”, "Kəşkül” qəzetləri haqqında məlumat verə bilmirəmsə, onda demək ki, mən heç ziyalı deyiləm.

 

Son olaraq nə demək istərdiniz?
-Son olaraq müəllimlərin peşə bayramını təbrik etmək istəyirəm. Onlara can sağlığı, firavanlıq arzu edirəm. Arzu edirəm ki, həmişə fəxrlə, başları uca şəkildə deyə bilsinlər ki, mən müəlliməm.
Elnarə Salamova
Xeberle.com